Komisioni përkatës parlamentar ka miratuar të martën me shumicë votash projektligjin me titull “Pjesëmarrja politike e homogjenëve dhe e shtetasve të vendeve të treta që banojnë ligjërisht dhe për një kohë të gjatë në Greqi”, thënë shkurtimisht projektligji për nënshtetësinë dhe të drejtën e votës.

Për projektligjin votuan pro deputetët e PASOK-ut e të SYRIZA-s, kundër Demokracia e Re dhe LAOS, kurse partia Komuniste u rezervua ta shprehë votimin e saj gjatë senacës plenare, gjatë ditëve të ardhshme.

Raportuesi i PASOK-ut, deputeti Janis Diamantidis, theksoi se objektiv i qeverisë është të garantojë paqen, sigurinë dhe tolerancën sociale në vend, të mbrojë të drejtat njerëzore të emigrantëve, si dhe të vendosen rregulla transparence në legjislacionin aktual për emigracionin.

Ai nënvizoi se Greqia do të pushojë së qeni ‘vresht pa zot’, ndërse kritikoi ata që reagojnë ndaj integrimit social të gjithë emigrantëve që jetojnë e punojnë ligjërisht në Greqi dhe shtoi se “duhet ta trajtojmë këtë problem të madh e ekzisten, pa paragjykime dhe populizma”.

Deputeti socialist stigmatizoi akuzat e Demokracisë së Re dhe LAOS-t që bëjnë fjalë “për përpjekje të PASOK-ut që të tjetërsojë rezultatin e zgjedhjeve për pushtetin lokal”, duke theksuar se e drejta për të zgjedhur e për t’u zgjedhur, ka të bëjë vetëm me 65 mijë emigrantë, të shpërndarë në gjithë territorin grek.

Oponenti i demokracisë së re, ish zëvendësministri i brendshëm Athanasios Nakos, kërkoi tërheqjen e projektligjit, duke e cilësuar si “falcitet” dhe shtoi se zbatimi eventual i dispozitave do të transformojë përfaqësimin etnologjik e demografik të vendit nëpërmjet legalizimeve të tjera, do të rrisë në mënyrë kolosale vërshimet e emigrantëve klandestinë drejt Greqisë dhe se pasojat ekonomike do të jenë shkatërruese.

Sipas deputetit konservator, “predispozicioni i qeverisë është që me dispozita flu dhe me një velaturë humanitare, të garantojë një rezultat pozitiv për qeverinë në zgjedhjet lokale”.

Oponenti i partisë Komuniste, Jorgos Mavrikos, tha se zgjidhjet që ofron projektligji janë fragmentare. Ai shtoi se projektligji i ruan kriteret penale, ndërsa i evidenton, por nuk i zgjidh problemet. Ai vërejti se projektligji i ri e imponon marrjen e nështetësisë greke, në kohën që kjo e drejtë në çdo rast do të duhej të ishte fakultative dhe në varësi të dëshirës së të interesuarit.

Kritikë të ashpër ndaj projektligjit shpalosi, ashtu siç pritej, oponenti i LAOS-it, Adonis Georgiadis, i cili ftoi qeverinë to avancojë në zhvillimin e një referendumi, duke e argumentuar kërkesën e vet me 400 mijë firmat që siç tha, ka mbledhur partia e tij. Ai ftoi edhe SYRIZA-n që t’i bashkohet kërkesës së partisë së Karaxhaferit, përderisa, siç tha, Koalicioni i majtë ka deklaruar qëndrimin e tij se është në favor të referendumeve, kur kjo kërkesë përkrahet nga 100 mijë firmëtarë.

“Ne votojmë kundër projektligjit me të dy duart, me të dy këmbët e ç’gjë tjetër kemi”, tha deputeti i djathtë, që gjithashtu kundërshtoi argumentin e qeverisë se objektivi është integrimi social i emigrantëve që ndodhen ligjërisht në Greqi.

Përgjigjja e SYRIZA-s ndaj ftesës së LAOS-it ishte se “në çështjen e të drejtave njerëzore” nuk kanë vend referendumet, siç kishte deklaruar dy muaj më parë edhe kryeministri Papandreu. Oponenti i Koalicionit, Nikos Tsukalis, tha se partia e tij është në mënyrë konstante në favor të referendumeve, por në rastin konkret “kemi të bëjmë me një çështje politike, e cila evoluon në çështje të drejtash individuale”. Përfaqësuesi i të majtës theksoi se “cilado shoqëri, në çfarëdo moment kohor që iu nënshtrua logjikës së kështjellës së mbyllur dhe të izolimit, u shkatërrua”, dhe shtoi se “përkundrazi, shoqëritë e hapura e ruajtën nëpër shekuj identitetin e tyre”.

Në ditët e ardhshme pritet që projektligji që kalojë në seancën plenare e të hidhet në votim. Pavarësisht votave të opozitës, PASOK-u i disponon numrat e mjeftueshëm për ta mirtuar, ndërkohë që votë pozitive pritet t’i jepë edhe SYRIZA.



E Premte, 05 Mars 2010