Me shpresën se do të arrijë të bindë partnerët e vet dhe tregjet ndërkombëtare, qeveria greke shpalli të mërkurën masat shtesë të planit për stabilitetin ekonomik.

Duke dalë nga takimi me presidentin e Republikës, të cilin e informoi mbi masat, kryeministri Papandreu e cilësoi paketën e tanishme si “një emergjencë e jo përzgjedhje”. Ai ka lënë të hapur mundësinë që vendi t’i drejtohet Fondit Monetar Ndërkombëtar (FMN). Sipas burimeve që citohen nga shtypi grek, në mbledhjen e këshillit të ministrave, të mërkurën, zoti Papandreu ka thënë se “Tani është ora e Europës dhe nëse nuk na mbështet, do t’i drejtohemi FMN-së”...

Reduktime të mëtejshme në pagat dhe kompensimet e sektorit publik, rritje e tatimit të vlerës së shtuar (FPA), taksa të reja për karburantet, cigaret dhe pijet alkoolike, janë disa nga masat, me zbatimin e të cilave qeveria synon të inkasojë rreth 5 miliardë euro, dhe të realizojë kështu objektivin për uljen me 4% të deficitit buxhetor brenda vitit 2010.

Në fillim të javës, masat u diskutuan me komisionerin për financat të BE-së, Olli Rehn, që kishte ardhur për këtë qëllim në Athinë

Komisioni Europian:

Paçi kurajë!...

Në përfundim të konferencës për shtyp në Athinë, komisionieri për financat Olli Rehn ka folur greqisht, duke shprehur urimin që grekët i bëjnë njeri tjetrit më momente vështirësisht të mëdha: “Kalo kurajo!” - Paçi kurajë, tha fjalë për fjalë zoti Rehn, duke dashur së pari të inkurajojë qeverinë në marrjen e masave të reja, që ai i kërkoi gjatë takimeve me gjithë zyrtarët vendas.

Por urimi i zotit Rahn synonte edhe vetë qytetarët grekë, mbi supet e të cilëve do të bjerë pesha e zbatimit të masave të reja.

Zoti Rehn tha se Komisioni dhe Bashkimi Europian, do ta mbështesë Greqinë, me qëllim që siç tha, ekonomia greke të rikthehet në një kurs jetësor, çka do të jetë në dobi të të gjithë qytetarëve. Por ai theksoi se kjo mund të bëhet vetëm nëpërmjet reformave strukturore në ekonomi dhe kontrollit të shpenzimeve. Ose do ta kontrolloni borxhin, ose borxhi do t’ju kontrollojë juve, tha shprehimisht komisioneri europian. Ai shtoi se pavarësisht masave të reja, Greqia do të vazhdojë të jetë nën mbikyrje, e cila do të bëhet më e rreptë.

Pas takimit me zotin Rehn, ministri i financave, Jorgos Papakonstandinu, theksoi edhe njëherë gatishmërinë e qeverisë për të avancuar edhe në masa të tjera, po qe se do të jetë e nevojshme. “Qeveria do të bëjë gjithçka që duhet, përfshirë edhe marrjen e masave të reja, kështu që të realizohet pa devijime objektivi për uljen e deficiti me 4 % brenda vitit 2010”, tha ministri grek.

Kryeministri: Jemi

në gjendje lufte

Pas largimit të komisionerit Rehn, Kryeministri Jorgos Papandreu ka mbajtur një fjalim me tone dramatike për të shpjeguar nevojën e masave të reja, më shtrënguese. Duke folur para grupit të vet parlamentare, zoti Papandreu tha se vendi ndodhej në gjendje lufte dhe theksoi vendosmërinë për të mos dezertuar, siç tha shprehimisht.

Për të shpjeguar domosdoshmërinë e marrjes së masave shtesë, kryeministri grek tha se po të mos merren masat, buxheti i shtetit nuk do të jetë në gjendje të paguajë madje dhe pagat e muajit të ardhshëm: “Po të mos bëjmë atë që duhet, për të shpëtuar ekonominë dhe dinjitetin tonë, nesër rrezikojmë të mos kemi të paguajmë jo vetëm pagën e 14-të, por as të 6-n, as të 5-ën, madje as të 4-tën, apo edhe pensionet”.

Shefi i qeverisë greke tha se do të ishte diçka më shumë se katastrofë, nëse vendi nuk mund të marrë kredi me kushte të njëjta që marrin hua edhe vendet e tjera të BE-së. Në përgjigje të opinioneve se masat e reja do ta zhytin vendin në recesion më të thellë, zoti Papandreu se vendi nuk kërcënohet prej recensionit, por nga pamundësia e huamarrjes dhe asfiksia e pagesave. “I ftoj të gjithë të mendojnë se ç’do të ndodhë nëse në të ardhmen e afërt vendi nuk do të mjundet të paguajë rrogat dhe pensionet, nëse sistemi bankar shtrydhet, nëse shteti nuk mundet të marrë hua. Kush e konsideron këtë një skenar të largët, nuk e ka kuptuar se në ç’gjendje ndodhet sot Greqia”

“Vendi paguan mungesën e kredibilitetit, që u shkaktua prej veprimeve të qeverisë së mëparshme, tha më tej kryeministri grek, dhe shtoi se Greqia tani ka nevojë për mbështetjen e partnerëve të saj, të cilët, për ta ofruar këtë mbështetje, duhet të bindin qytetarët e tyre, prej të cilëve kërkojnë sakrifica, se grekët bëjnë atë që duhet”.

Papandreu: “Mora rrugën...”

Projektligji me masat e reja ekonomike do të shtrohet për votim të premten, me procedurën e emergjencës. Por zoti Papandreu nuk do të jetë i pranishëm, pasi nëa to momente do të ndodhet në Berlin, për t’u takuar me kancelaren gjermane, Angela Merkel. Të dielën do të takohet në Paris me presidentin francez Nikolas Sarkozy, dhe të hënën fluturon drejt Uashintonit, ku do të pritet nga presidenti amerikan Barack Obama.

Ministria gjermane e financave shprehu të mërkurën “respekt” për masat e reja që komunikoi qeveria greke, të cilat, sipas Berlinit, “tregojnë se Greqia po bën me të vërtetë përpjekje për të përmirësuar financat e veta publike”. Gjithsesi, zonja Merkel ka lënë të kuptohet se nuk do të ofrojë ndihmë ekonomike për Greqinë, të paktën gjatë takimit të fundjavës.

Zëdhënësi i qeverisë gjermane tha se “vizita e kryeministrit grek do të shërbejë për t’u diskutuar situata, si shprehje e nivelit të mirë të marrëdhënieve gjermano-greke”. Zëdhënësi shtoi se Gjermania i mirëpret masat e reja dhe ftoi Greqinë që të garantojë zbatimin e tyre.

Barroso:

Mbështesim Greqinë

Presidenti i Komisionit Europian, Hose Manuel Barroso u shpreh se Bashkimi Europian duhet të ketë solidaritet ndërmjet veti dhe shtoi se janë duke u zhvilluar konsultime intensive për mënyrën se si do të mund të ndihmohet më mirë Greqia.

Zoti Barroso nuk dha hollësi, ndërkohë që burime nga Brukseli bëjnë të ditur se po përgatitet një plan emergjence, që do të vihet në zbatim nëse Greqia përfundimisht nuk do të arrijë të paguajë borxhin e vet.

Duke iu referuar masave të qeverisë greke, zoti Barroso shprehu kënaqësinë në emër të BE-së dhe tha se masat e tanishme konfirmojnë angazhimin e qeverisë greke për reduktimin e deficitit buxhetor në masën 4% brenda vitit 2010 dhe për zbatimin e programit të saj ambicioz për përmirësimin e financave publike të vendit. Zoti Barroso i cilësoi si shumë të rëndësishme masat dhe vlerësoi se ato do të rigjallërojnë ekonominë greke, “në dobi të popullit grek dhe të eurozonës”.

Komisioni Europian e mbështet Greqinë dhe konsideron se masat e reja janë një “dëshmi e fuqishme” e vendosmërisë së qeverisë greke për realizimin e angazhimeve, përfundoi presidenti i Komisionit Europian, Hose Manuel Barroso.



Masat:

Ndër masat, që komunikoi të mërkurën zëdhënësi i qeverisë greke, Jorgos Petalotis dhe që synojnë të konvertohen në 4,8 miliardë euro, më kryesoret janë:

- Reduktim në masën 30% të dhuratës së Krishtlindjeve, Pashkëve dhe lejes së zakonshme, për punonjësit e sektorit publik.

- Reduktim i kompensimeve të punonjësve të administratës në masën 12%.

- Reduktim në masën 5% (500 milionë euro) i programit të investimeve publike, 100 milionë euro në të njëjtin program të ministrisë së arsimit, dhe 100 milionë euro për programet e tjera të ministrisë së arsimit.

- Ulje 20% e çmimit të barnave.

- Rritje e tatimit të vlerës së shtuar (FPA), nga 4,5% në 5%, për nivelin shumë të ulët, nga 9% në 10% për nivelin e ulët dhe nga 19% në 21% për nivelin e lartë. Koeficentët e FPA nuk ndryshojnë për ishujt.

- Rritje e taksës së posaçme në karburantet, me rezultat rritjen e çmimit të benzinës 8 cent për litër dhe të naftës 3 cent për litër.

- Rritje me 20% e taksave të posaçme në cigare dhe pije alkoolike.

- Taksë e posaçme konsumi për energjinë elektrike.

E Premte, 05 Mars 2010