“Fatkeqësia vjen gjithmonë fluturim dhe ikën çalë-çalë”. Kjo thënie e Volterit ka gjetur të vërtetën e vetë, kudo ku kanë ndodhur fatkeqësitë masive të përmbytjeve, zjarreve, tërmeteve... Ashtu siç ndodhi edhe me bashkatdhetarët tanë të Shkodrës dhe rrethinave të saj. Përmbytjet e këtij fillim-viti, erdhën rrëmbyeshëm, duke e bërë ndryshe fushën, bahçen, rrugët, oborret, shtëpitë, ... duke ndryshuar jetën e njerëzve. Në këto raste-fatkeqësish, fjala “Ndihmë” merr kuptimin dhe vlerat e vërteta.

Përmbytjet e zonës së Shkodrës treguan se solidariteti njerëzor ekziston akoma si pjesë e moralit dhe virtytit të shqiptarëve. Dhe ky solidaritet ndodh në kushte të reja, kur kriza ekonomike gjendet brenda xhepave të emigrantëve, të cilët, dita -ditës po humbasin vendet e punës.

Ambasadori i Shqipërisë në Greqi, Dr. Vili Minarolli e njeh situatën, me interesim të vazhdueshëm ...

Qytetarët shqiptarë që jetojnë në Greqi dhe shumë institucione greke, kryesisht bashki dhe prefektura, u solidarizuan plotësisht me thirrjen që u bërë ambasadori, për të ndihmuar të dëmtuarit nga përmbytjet.

Dhe zoti Minarolli na tregon:

“Përjetuam çaste emocionuese në këtë fushatë solidarizimi, të shqiptarëve emigrantë si dhe të miqve tanë grekë. Njerëz të ndryshëm, të panjohur, që edhe nuk donin të deklaroheshin, jepnin ndihmat e tyre. Më ka mbetur në mend një emigrant, i cili, kur rastësisht, u gjend aty ku po ngarkohej makina me ndihma, tha: “Prisni, ju lutem, sa të blej dhe unë diçka për bashkatdhetarët!”- hyri në supermarket dhe solli një kuti të madhe me ushqime.

Por, veçanërisht, dua të përmend shoqatat e shqiptarëve, këto shoqata që mbajnë ndezur atdhetarinë, forcojnë miqësinë dhe organizohen edhe për situata të vështira të shqiptarëve në atdhe. Vlen të përmendim, duke falënderuar, shoqatën e Egjios me kryetar Ardian Gjini. Shoqatën në Trikalla me kryetar Ilir Dibrën, Shoqatën e Kallamatës me kryetar Yzeir Mirakën, dy shoqatat e Volosit me kryetarë Eduart Tafaj dhe Dr. Leonidha Rushitin; Shoqatën e Korinthit me kryetar Irfan Abazaj, Shoqatën e Megaros me kryetar Ardian Daullen, shoqata me kryetar Kastriot Lekdushi etj.

Pati edhe persona të veçantë që kontribuan me mjete transporti, ku mund të përmend biznesmenin Roland Qiricin me veprimtari në Selanik, pronari i agjencisë të transportit Ballkan Trans, Kuçovë, dërgoi një maune me rimorkio nga Berati dhe mblodhi ndihmat e grumbulluara nga shoqatat e shqiptarëve në Volos, Trikalla dhe Kalambaka si dhe ato që ishin grumbulluar në Ambasadë nga Antena dhe bashkia Anavisos. Po kështu ndihmoi edhe Florian Merolli me veprimtari transporti në Korçë-Athinë.

Ndihma e parë, nga institucionet greke, ishte nga Bashkia e Marusit, që, me mjetet e tyre dërguan 20 ton ushqime dhe pajisje shtëpiake. Vetë kryetari i bashkisë ishte në krye të këtij organizimi.

Gatishmëria e biznesmenit, Pavllo Apostolit, bashkëpronar i një kompanie farmaceutike, që ka veprimtari edhe në Shqipëri, i cili mundësoi të siguronte 21.4 ton klor, nëpërmjet drejtorit të ujësjellësit të Athinës, aq i domosdoshëm për klorimin e mjediseve të pas përmbytjeve. Një ndihmë e konsiderueshme kjo, kur dihet se një ton klor ka vlerën e 900 €, pra rreth 20 mijë €, veç transportit dhe mjeteve të tjera ndihmëse.

Nga prefektura e Trikallas u çuan 20 ton ushqime për banorët dhe 18 ton ushqime për kafshët. Po kjo prefekturë, më 4 mars do të çojë edhe 10 ton ushqime për qytetarët e prefekturën e Shkodrës. Ndihma të konsiderueshme të bashkisë dhe prefekturës së Korinthit u shoqëruan nga zëvendës prefekti dhe nga kryetari i shoqatës Irfan Abazaj, direkt për në prefekturën e Shkodrës.

Si dhe mbi 30 ton ushqime dhe veshje te reja dhuruar nga shqiptarët, stacioni televiziv ANTENA dhe Bashkia Anavisos.

I veçantë ishte takimi i Ambasadorit Minarolli me zotin Minos Kyriakou, me orgjinë nga Poliçani i Gjirokastrës, drejtues i stacionit televiziv ANTENA, i cili u solidarizua dhe shprehu gatishmërinë për ndihma në vazhdim.



Duart që japin janë më të shenjta se buzët që luten... Është një shprehje kjo e ardhur nga përvoja e jetës njerëzore, në shekuj, por që zë vend në mirënjohjen e banorëve të zonave të përmbytura.

Duart e ndihmës u zgjatën nga bashkëkombësit tanë, të cilët nuk dalin dot nga hallet e shqiptarëve që jetojnë në vendin e tyre. Makinat me ndihma nuk kalonin vetëm nga vendi fqinj, në doganat greke e shqiptare, për në udhët, që të shpinin në Shkodër, por kalonin edhe nëpër udhët shpirtërore të fëmijëve për prindërit, për fqinjin, bashkëqytetarin e bashkëkombasin, si dhe në udhët e miqësisë të dy popujve. Mikpritja ishte ashtu siç dinë shkodranët.

Kryetari i bashkisë Lorenc Luka, prefekti Maxhid Cungu ishin mikpritësit e miqve grekë, të ardhur së bashku me ndihmat, -na thotë Ambasadori Minarolli dhe veçon nëndrejtorin e përgjithshëm të Policisë Rrugore, që garantoi udhëtimet pa asnjë problem të autokolonave që shkonin në drejtim të Shkodrës. Në bazë të planit të komisionit ndërqeveritar ishin marrë të gjitha masat e pritjes së autokolonave, që nga doganat e deri në depot e pritjes në Shkodër.

Le ta mbarojmë shkrimin tonë me fjalët e Kryetarit të Bashkisë së Marusit, zoti G. Patuli, qysh në datën 11 janar deklaroi: “Bashkia e Marusit ndodhet pranë vendit tonë fqinj, me të cilin na afrojnë lidhje vëllazërore dhe miqësore, të cilat forcohen edhe më shumë nga mijëra emigrantë ekonomikë shqiptarë, që punojnë në vendin tonë. Do të ndodhemi pranë tyre me çdo lloj ndihme, ashtu siç jemi pranë çdo njeriu që ndodhet në nevojë!”...

E Premte, 05 Mars 2010