Komisionerja për Punë të Brendshme, Cecilia Malmstrom, ka konfirmuar në Bruksel se shtetet anëtare të Bashkimit Evropian janë akorduar rreth dhënies së Udhërrëfyesit për Liberalizim të vizave, i cili do t’u kalohet institucioneve të Kosovës në mes të qershorit.

Njoftimi u dha nga burimet zyrtare në Prishtinë, pasi në Bruksel u mbajt takimi i parë inaugurues për “Dialogun e Strukturuar për Sundim të Ligjit”, ndërmjet qeverisë së Republikës së Kosovës dhe Komisionit Evropian.

Qeveria e Republikës së Kosovës ka pranuar garanca të forta nga KE, që ky dialog do të çojë përpara axhendën evropiane dhe nuk është një mekanizëm që do të zëvendësojë procesin e vërtetë të integrimeve evropiane. Për më tepër, kjo do ta ndihmojë përafrimin e Kosovës me strukturat e Bashkimit Evropian dhe është në linjë me iniciativat e ngjashme në rajon.

Bëhet e ditur se Komisioni Evropian dhe qeveria e Republikës së Kosovës u pajtuan që Kosova të vazhdojë punën për reformën në fushën e drejtësisë. Qeveria e ka informuar KE-në për punën që është bërë në reformën e sistemit gjyqësor, duke finalizuar Kodin Penal e Kodin e Procedurës Penale si dhe me punën rreth amendimit të legjislacionit për fushën e Gjyqësorit dhe Prokurorisë.

Sa i takon luftës kundër korrupsionit, delegacioni qeveritar ka prezantuar hapat e ndërmarra brenda Këshillit Kombëtar Kundër Korrupsionit, si dhe ka informuar KE-në mbi hartimin e legjislacionit të ri që ka për qëllim ashpërsimin e luftës kundër krimit të organizuar dhe korrupsionit.

Dialogu i strukturuar për sundim të ligjit, do të zhvillohet tani e tutje dy herë në vit për t’i caktuar prioritetet për reformë në fushën e sundimit të ligjit dhe për t’i monitoruar rezultatet e arritura në këtë fushë.

E Hene, 04 Qershor 2012