Fundjava shënoi fillimin e ardhjes së emigrantëve shqiptarë, që jetojnë dhe punojnë në Greqi, për pushime në vendlindje. Gjatë 24 orëve të fundit nëpërmjet vendkalimit kufitar të Kapshticës, në rrethin e Devollit, kanë hyrë në vendin tonë 4500 vetë me 2000 mjete, bënë të ditur burime nga ky vendkalim.

Policia kufitare shqiptare ka marrë masa që mbrritja dhe kthimi i emigrantëve gjatë korrikut e gushtit të përballohen sa më lehtë. Sot në pikën e kalimit të kufirit në Kapshticë punohej me 6 sportele, ndërsa në atë greke me dy sportele. Megjithatë nuk ka pasur radhë pritjeje.

Emigrantët që po vijnë me pushime, pohojnë se vazhdojnë të përjetojnë krizën ekonomike që ka përfshirë shtetin grek dhe mundësinë e rikthimit të shpejtë në vendin tonë, për fillime biznesesh dhe krijim të fermave blegtorale e bujqësore etj.



E Hene, 02 Korrik 2012