Mbi 3250 emigrantë shqiptarë, që jetojnë dhe punojnë në Greqi, janë kthyer gjatë 24 orëve të fundit në atdhe për pushimet verore, njofton policia kufitare e Kakavijes, në jug të vendit.

"Gjatë 24 orëve të fundit kanë hyrë mbi 3250 emigrantë, 796 automjete, ndërsa 3050 persona kanë dalë nga territori shqiptar", thanë burimet zyrtare.

Sipas tyre, parashikohet që numri i emigrantëve shqiptarë të rritet akoma më shumë gjatë kësaj jave.

Në kufirin Shqipëri-Greqi, në prefekturën e qarkut të Gjirokastrës, funksionojnë me kohë të plotë dy vendkalime kufitare, ajo e Kakavijës, që ndodhet rreth 25 kilometra larg qytetit të Gjirokastrës, në drejtim të jugut dhe "Tre Urat", që ndodhet rreth 22 kilometra larg qytetit të Përmetit, në drejtim të perëndimit. Ndërsa pika kufitare e Sopikut, që ndodhet rreth 50 kilometra larg qytetit të Gjirokastrës në komunën e Pogonit, funksionon vetëm për këmbësorët.



E Hene, 16 Korrik 2012