Lejet e legalizimit të banesave miratohen brenda 30 ditësh nga pagesa e detyrimeve dhe dega rajonale e ALUIZNI-t në Durrës këto ditë po punon për të sensibilizuar veçanërisht emigrantët që kanë ardhur me pushime në vendlindje.

Drejtori rajonal i ALUIZNI-t, Erion Jakova, tha për ATSH-në se përshpejtimi i procedurave ka rritur interesin e qytetarëve për pagesat e detyrimeve, menjëherë pas të cilave miratohet edhe leja e legalizimit. Sipas Jakovës, aktualisht përpunohen dhe miratohen deri 40 leje legalizimi në ditë.

"Njoftimi i emigrantëve që jetojnë dhe punojnë në vende të ndryshme të Evropës Perëndimore bëhet më i vështirë dhe ne përfitojmë nga kthimi i tyre për pushime pranë familjeve për t'i njohur me procedurat e përshpejtuara të legalizimit", shton kreu i drejtorisë rajonale të Legalizimit.

Pagesat që nisin me 300 mijë lekë për sipërfaqe nga 300-500 metra katrorë, në varësi të vendndodhjes së tyre jashtë apo brenda vijës së verdhë, mund të shlyhen deri në masën 50 për qind edhe me bono të privatizimit.

Jakova thotë se vetëm në territorin e bashkisë së Durrësit ka 20.228 aplikime për legalizime të banesave, ndërsa numri i përgjithshëm në 16 bashkitë dhe komunat e qarkut arrin në 37.735 ndërtime pa leje.

Deri tani në Durrës janë pajisur me leje legalizimi rreth 1900 familje.



E Hene, 16 Korrik 2012