Fluksi i lëvizjes nga Kosova në drejtim të bregdetit shqiptar shënon ritme normale gjatë javës. Ndërsa në fundjavë shënohet një fluks i madh i hyrjes së shtetasve kosovarë nga Shqipëria në Kosovë. Janë shtetas që zakonisht kalojnë ditët e fundjavës në bregdet, ndërsa kthehen pranë banesave të tyre në fillimjavë.

Për të përballuar fluksin e madh të lëvizjes në të dy anët e kufirit në doganën e Morinit janë në punë 6 sportele për kontrollin e dokumentacionit, gjë që ka mundësuar eliminimin e radhëve të gjata në mjediset e doganës.

"Gjatë 24 orëve të fundit kanë hyrë në Shqipëri rreth 13 mijë persona, ndërsa kanë hyrë në Kosovë rreth 39 mijë persona, kryesisht shtetas kosovarë që kthehen në vendlindje pasi kanë kaluar ditët e fundjavës në bregdetin shqiptar", pohojnë burime zyrtare të policisë kufitare.

Ndërkohë, aksidentet e rënda në segmentin e autostradës Tunel-Kukës-Morin të javës së kaluar, ku humbën jetën 4 persona dhe mbetën të plagosur 9 të tjerë, kanë rritur shqetësimin ndër udhëtarët që lëvizin në të dy anët e autostradës. Dëmtimi i trafikndarëseve, mungesa e sinjalistikës horizontale dhe vertikale dhe mungesa e mbikalimeve në qendrat e banuara, janë shkaqet kryesore të aksidenteve të ndodhura në këtë segment të autostradës. E njëjta gjë mund të thuhet edhe për mungesën e mbikalimit në rrugën që lidh qytetin e Kukësit me liqenin e Fierzës, ndonëse tashmë janë qindra banorë të të gjitha moshave që lëvizin në të dy anët e autostradës çdo ditë.

Dogana e Morinit është dogana kryesore përmes së cilës kryhet lëvizja e vizitorëve dhe mallrave mes dy vendeve, ndonëse në kufirin Shqipëri-Kosovë, të gjatë rreth 121 kilometra, janë në punë edhe 5 pika të tjera të kalimit kufitar.



E Hene, 16 Korrik 2012