Vangjel Tavo: &ldquoLSI i fiton zgjedhjet. Do të propozojmë koalicion të gjerë me PD dhe PS&rdquo

Robert GORO 22 Qershor 2017

Edhe kur ka qenë në partinë Socialiste, edhe tani në Lëvizjen Socialiste për integrim, Vangjel Tavo konsiderohet si një nga pak deputetët që ka mbajtur lidhjet më të ngushta me emigracionin në Greqi, duke qenë i pranishëm dukshëm më shumë se homologët e vet, që zakonisht janë kujtuar vetëm në periudha zgjedhore. Prandaj dhe pyetja e parë, natyrshëm, lidhet me motivimin që ndjen zoti Tavo për të qenë kaq i lidhur me emigracionin shqiptar në Greqi. VANGJEL TAVO: Në fakt, edhe në PS, edhe në LSI kam qenë kryetar i komisionit për emigracionin dhe kam mbajtur realisht lidhje shumë të shpeshta, jo vetëm kur vij në Greqi, por edhe emigrantët kur vijnë në Shqipëri më takojnë për shumë probleme që kanë. Nga ana tjetër, kontaktet i mbajmë edhe nëpërmjet telefonit. Nuk i kam parë asnjëherë emigrantët thjesht si pjesë e elektoratit që mund të vijmë në fushatën zgjedhore e t’i kërkojmë votën, siç ndodh rëndomë, nga shumë politikanë të tjerë dhe shumë forca politike. Por emigrantët i kam parë gjithmonë si pjesë të pandarë të zonave tona, të qarqeve tona. Pasi ata janë bashkëbanorët tanë, pavarësisht se ndodhen përkohësisht në Greqi. Kjo ndodh sepse kushtet e jetesës janë më të mira këtu dhe normalisht duhej që për 27 vjet politika shqiptare të kishim krijuar kushte më të mira jetese, jo vetëm për njerëzit që jetojnë atje, por edhe për emigrantët, në mënyrë që të kthehen e të jetojnë e punojnë në atdheun e tyre. Po për fat të keq, akoma nuk ia kemi arritur dhe kjo për faj të politikës e jo për faj të njerëzve. TRIBUNA: Lëvizja Socialiste për Integrim, të paktën në dy zgjedhjet e fundit, në 2013 dhe tani, i ka kushtuar shumë vend emigracionit. Megjithatë, edhe pse mori përsipër barrën e promovimit të dhënies së të drejtës së votës emigrantëve që nga viti 2009, kjo ende nuk është realizuar. Pavarësisht se kryetari juaj, zoti Meta, më pati thënë në korrik të 2009-s, se dhënien e të drejtës së votës emigrantëve, e kishte vënë si një nga kushtet për pjesëmarrjen në qeverinë Berisha. Pra, dakord, nga njera anë është faji i politikës, por nga ana tjetër, a mund të kishte insistuar më shumë LSI, me qëllim që ky angazhim të realizohej? VANGJEL TAVO: Unë mund t’ju them vetëm kaq, e kam thënë dhe në takimet me emigrantët: LSI, nëpërmjet përfaqësuesit të saj, që isha unë, në komisionin e reformës zgjedhore, në vitin 2012 në mos gaboj, ka kërkuar zyrtarisht si forcë politike në këtë komision dhënien e të drejtës së votës emigrantëve. Dhe në pamundësi për të realizuar votimin në Greqi për arsye të mungesës së infrastrukturës -siç pretendonin partia Demokratike dhe Partia Socialiste që ishin pjesë e komisionit-, unë propozova atëherë që emigracioni të konsiderohet si një qark më vete dhe emigrantët të votojnë në Greqi dhe vota e tyre të numërohet këtu dhe ata të kishin përfaqësuesit e tyre në Kuvendin e Shqipërisë. (Unë kisha propozuar 15 deri 20 përfaqësues). Dhe të shmangnim edhe “problemin” që për mua nuk është aspak problem që një shtet si Shqipëria të krijojë kushtet që të votojnë emigrantët këtu sepse ekzistojnë të gjitha mundësitë për ta realizuar. Por meqë ata e nxirrnin si pretendim, për ta shmangur këtë problemin hipotetik që ngritën PD dhe PS, unë bëra propozimin që emigracioni të ishte qark më vete dhe jo votat e emigrantëve të numëroheshin për qarqe të ndryshme në Shqipëri, pse realisht do të mund të kishte probleme dhe kaos gjatë procesit. As kjo nuk është pranuar... TRIBUNA: Me çfarë argumenti nuk e pranuan? VANGJEL TAVO: Me argumentin që nuk janë krijuar kushtet për të pasur në emigracion një proces zgjedhor të lirë, demokratik, të pakontestueshëm, etj., etj. Ndërkohë që unë jam i bindur që emigrantët këtu në Greqi, dhe në Itali dhe në vende të tjera të BE-se, duke qenë se kanë vite që jetojnë në këto vende dhe kanë parë shumë procese zgjedhore, do të kishin mundësinë që të organizonin një proces model dhe të na jepnin leksion edhe neve në Shqipëri dhe politikës shqiptare. Kështu që argumenti i PD dhe PS për mua është një argument i paqenë, ishte thjesht një justifikim për të mos lejuar emigrantët që të votonin. Vota e emigrantëve, ose fuqia elektorale e emigrantëve është shumë e madhe; unë mund të them që duhet të jetë diku te një e treta e fuqisë elektorale të gjithë Shqipërisë dhe kjo i tremb PD-në e PS-në. Dhe kjo është arsyeja kryesore përse ato krijojnë barriera kur bëhet një propozim i tillë për votën e emigrantëve dhe më vjen keq por do ta them, më lejon përvoja ime shumë e gjatë në politikë, për të thënë që nuk ekziston vullneti, as i PS-së dhe as i PD-së, për arsye të kësaj që thashë pak më përpara, se ato tremben nga vota e emigrantëve. Pse emigrantët janë njerëzit më realistë, e shikojnë me shumë realizëm politikën shqiptare dhe ata janë njerëz që nuk mund t’u bësh presion për votën, apo t’ua blesh votën. Dhe kjo është është arsyeja përse dy forcat politike nxjerrin justifikime nga më të ndryshmet për të mos lejuar emigrantët që të votojnë në vendet ku ata jetojnë dhe punojnë. Dhe, lejohem të bëj një deklaratë jo shumë optimiste për emigrantët: PD e PS as nuk kanë për ta bërë këtë. Për sa kohë sa PS e PD do të jenë në politikën shqiptare dhe do të kenë të njëjtin mendim -se e kanë të njëjtin mendim-, nuk ka për t’u realizuar. LSI vazhdon ta ketë pjesë të vetën, jo thjesht të programit elektoral -absolutisht jo-, por pjesë të qenësishme të programit të vet politik, të filozofisë së vet, që shqiptarët kudo që ndodhen, duhet të shprehin vullnetin e tyre në zgjedhjet parlamentare dhe ato lokale në vendin tonë. Shpresojmë që LSI të dalë vërtetë forca e parë politike nga këto zgjedhje dhe ta bëjë realitet këtë kërkesë shumë të ligjshme të emigrantëve. TRIBUNA: LSI gjatë gjithë kësaj fushate elektorale po kërkon votën masive të shqiptarëve, me qëllim që të dalë forcë e parë në zgjedhjet e 25 qershorit. Madje edhe spotet elektorale ngjajnë të tilla sikur do të dalë forcë e parë. Ku mbështetet gjithë ky optimizëm për një fitore të LSI-së? VANGJEL TAVO: Ka shumë arsye që ne pretendojmë se do të jemi forcë e parë. Ndër vite LSI ka qenë një forcë që ka kontribuar në stabilitetin politik në vend dhe këtë e kemi treguar jo një herë, por disa, edhe në parlament, edhe në qeveri, edhe publikisht. LSI ka kontribuar fuqishëm, shpeshherë kur politika shqiptare me konfliktualitetin e vet ka ndikuar në krijimin e problemeve dhe jo në zgjidhjen e tyre, ka qenë LSI ajo që ka ndërhyrë dhe i ka ulur forcat politike në tavolinë dhe ka kontribuar në gjetjen e gjuhës së konsensusit. Kjo ka ndodhur edhe këto vitet e fundit, qpftë me miratimin e reformës në drejtësi, ku ishte Ilir Meta ai që vendosi veton për t’u miratuar kjo reformë me konsensus nga 140 deputetë. Më vonë përsëri në krizën e fundit politike ka qenë përsëri LSI që ka bërë presionin e vet ndaj forcave politike për të gjetur gjuhën e konsensusit në mënyrë që opozita të kthehej në parlament, të votonte vettingun, që opozita të ishte pjesë e procesit zgjedhor, sepse do të ishte fatale nëse do të shkonim në zgjedhje pa opozitën ashtu siç pretendonte Edi Rama që mund të zaptonte parlamentin e të linte opozitën jashtë. Dhe kur flasim për opozitë nuk bëhet fjalë për dy apo tre forca politike dhe liderët e tyre, po bëhet fjalë për rreth 40 % të elektoratit, rrjedhimisht të popullit shqiptar, që ishin në opozitë deri në këto zgjedhje. Kështu që LSI ka kontribuar fuqishëm në zgjidhjen e konflikteve të ndryshme midis forcave politike, konflikte që ishin artificiale dhe krijoheshin nga forcat politike për interesin e tyre dhe të liderëve respektivë. Kjo është një nga arsyet pse ne mendojmë fuqishëm që shqiptarët, duke qenë se janë lodhur nga kjo politikë konfliktuale do të mbështesin LSI-në dhe politikën e vet të stabilitetit dhe të integrimit të vendit në Bashkimin Europian, sepse është pikërisht ky stabilitet politik që do të krijojë kushtet e nevojshme, me reformat e nevojshme konsensuale, për të arritur që vendi ynë të jetë pjesë e familjes së madhe europiane - një aspiratë e të gjithë shqiptarëve. Nga ana tjetër, LSI mbështetet fuqishëm në rininë shqiptare. Ne i kemi mbështetur të rinjtë, edhe në parlament, me politika arsimore për rritjen e cilësisë sidomos të arsimit të lartë, kemi kontribuar shpeshherë edhe në komisionet parlamentare, por kemi pasur dhe debat kur e ka dashur puna, me ministren e arsmit; gjithmonë për të kontribuar për një arsimim sa më cilësor të të rinjve. Nga ana tjetër, ne kemi kontribuar dhe do të vazhdojmë të kontribuojmë duke i mbështetur të rinjtë edhe në karrierën e tyre. Duke i ndihmuar për të filluar karrierën qoftë në administratën shtetërore, por jo vetëm. Ne kemi kontribuar dhe në hapjen e vendeve të reja të punës, duke stimuluar dhe biznesin privat, gjithmonë me iniciativat e grupit parlamentar te LSI, siç ishte iniciativa për industrinë fason, që përkthehet në hapje të vendeve të reja të punës. Duke nxitur me politika fiskale biznesin e vogël, biznesin e mesëm, por edhe biznesin e madh, gjithmonë për t’i stimuluar ata dhe për të hapur vende të reja pune për të rinjtë dhe të rejat shqiptare dhe për gjithë pjesën aktive të shoqërisë. Pra, janë një sërë arsyesh për se LSI, si forca kryesore që ka në boshtin e programit të vet integrimin e vendit tonë në familjen europiane, një aspiratë e kahershme e shqiptarëve që vitin 1990 kur unë kam qenë student dhe që akoma nuk po bëhet realitet. Dhe kjo për faj të politikanëve e jo për faj të shqiptarëve. Dhe ne mendojmë fuqishëm se politika e LSI-së ndër vite, po gjen mbështetje gjithmonë e më të madhe tek elektorati, tek populli dhe jemi të bindur që në këto zgjedhje gjithë kjo politikë do të kurorëzohet me fitoren e LSI-së dhe daljen e saj si forcë e parë politike, për të mbajtur peshën kryesore në qeverisjen e ardhshme të vendit dhe për të zgjidhur gjithë këto probleme të cilat shqiptarët i kanë jetuar vitet e fundit dhe i kanë përjetuar jo fort mirë. TRIBUNA: Në rast se kjo vërtetohet, pra LSI del forcë e parë, cili do të ishte partneri i preferuar për të krijuar qeverinë? VANGJEL TAVO: Të gjitha ato forca politike që do të jenë të angazhuara dhe do të jenë pjesë e një koalicioni të ardhshëm qeveritar që do të kontribuojë në integrimin e vendit tonë në Bashkimin Europian, në përmirësimin e kushteve të biznesit, të jetesës së shqiptarëve... TRIBUNA: Më falni, po gjithë forcat politike këto gjëra thonë, ju nuk po më thoni diçka të re. VANGJEL TAVO: Ka një ndryshim shumë të madh midis programeve të forcave politike, programeve elektorale dhe programeve qeverisëse. Të gjitha programet elektorale janë programe të hartuara nga specialistë shumë të mirë që i bëjnë me fjalë të mëdha dhe të bukura, për të bindur elektoratin që të votojnë për x apo y forcë politike. Po ta shikoni dhe ta vini re, nuk është i tillë programi i LSI. Programi i LSI është një program shumë i qartë, i detajuar, i hartuar mirë dhe mirëstudiuar edhe për mundësitë e buxhetit të shtetit për ta mbështetur atë program dhe për ta bërë një program qeverisës, jo thjesht një program elektoral. Pra gjithë këto foca parlamentare, pra gjithë deputetët, pse jo dhe të PS e të PD, të bashkohen me LSI-në për të krijuar një koalicion më të gjerë bashkë me LSI-në, për të krijuar me të vërtetë një koalicion që: E para, do të bëjë të mundur sa më shpejt integrimin e vendit tonë në BE, Do të bëjë të mundur miratimin e shumë reformave, jo vetëm me qëllim integrimin, por edhe përmirësimin e kushteve të jetesës, për rritjen e ekonomisë së gjithë vendit dhe në përgjithësi të ekonomive familjare. TRIBUNA: Në rast se nuk del LSI forcë e parë, por del partia Socialiste apo partia Demokratike... VANGJEL TAVO: Unë kam një shprehjen time, që në fakt më ka ardhur dhe e kam përdorur tani, gjatë fushatës elektorale, ku kam parë që, qoftë PS, qoftë PD, nuk konkurrojnë me alternativa e me programe, por kanë pjesë të fushatë së tyre sulmin ndaj LSI, në gjithë Shqipërinë dhe në zonën time, në Gjirokastër, ku unë kandidoj. Përgjigjja ime ka qenë: “Qesh më mirë ai që qesh i fundit”. Dhe unë e them me bindje që në fund fare do të qeshë LSI-ja, do të qeshin shqiptarët, sepse shqiptarët do të jenë ata që do të përfitojnë nga qeverisja e mirë e LSI pas zgjedhjeve. TRIBUNA: Po, por që të qeshin mirë, siç thoni, të gjithë shqiptarët, nuk mjafton të qeshë vetëm LSI-ja, por me kë forcë do të qeverisë. Cilën ka më të preferuar, partinë Socialiste apo partinë Demokratike... A mbetet si kusht ajo që është përmendur vazhdimisht kohët e fundit, që në rast të një bashkëpunimi midis PS dhe LSI, lëvizja juaj do të kushtëzojë bashkëpunimin me largimin e Ramës nga posti i kryeministrit? VANGJEL TAVO: Ne nuk mund të pranojmë dhe të lejojmë që njerëz të cilët kanë krijuar kushte për "kanabizimin" e Shqipërisë, njerëz që kanë koncensionuar gjithë sektorët jetikë të ekonomisë, që kanë dhënë me koncension gjithë shëndetësinë shqiptare dhe njerëz të cilët kanë kontribuar me politikën e tyre shumë të gabuar në këto vite në përkeqësimin e klimës së biznesit, në përkeqësimin e jetesës së qytetarëve, nuk mund të jenë pjesë e qeverisjes me Lëvizjen Socialiste për Integrim. Flas për njerëz, për individë, jo për forca politike. TRIBUNA: Ju falënderoj dhe ju uroj suksese ne betejën tuaj elektorale. VANGJEL TAVO: Edhe unë ju falënderoj.

Ndaje me miqte