“Forca e Ligjit”, sekuestrohen 1 mln euro në Fier

ATSH 03 Tetor 2018

Operacioni “Forca e Ligjit” ka sekuestruar 1 mln euro pasuri, të cilat dyshohen se janë akumuluar nga veprimtari kriminale.

Policia e Shtetit bën me dije se, në kuadër të luftës kundër krimit të organizuar dhe pastrimit të parave, gjurmimit, sekuestrimit me qëllim konfiskimi të aseteve kriminale që rrjedhin nga veprimtaria kriminale, është hapur procedimi penal i regjistruar për veprën penale “Pastrimi i produkteve të veprës penale ose veprimtarisë kriminale” parashikuar nga Neni 287 i Kodit Penal për hetime të pasurisë së shtetasit Vangjel Ziaj (Arben Gropa).

Në përfundim të veprimeve të kryera, nga ana e Sektorit për Hetimin e Krimit Ekonomik e Financiar në Drejtorinë Vendore të Policisë Fier në bashkëpunim me Prokurorinë e Rrethit Gjyqësor Fier, u zbatua vendimi i Gjykatës së Rrethit Gjyqësor Fier për sekuestro preventive në lidhje me pasuritë e shtetasit:

– V.Z., 50 vjeç, banues në Fier.

Ky shtetas është dënuar nga autoritetet italiane me 32 vjet e 6 muaj burg për veprën penale “Trafiku i narkotikëve” dhe është duke vuajtur dënimin në Itali.

Pasuritë e sekuestruara kapin vlerën e 1 milion eurove:

Kompleks shërbimesh “Pelikani” i ndodhur në lagjen “Sheq i Madh”, Fier.

Një apartament me sipërfaqe 70 metra katrorë në lagjen “Kryengritja e Fierit”.

Një automjet i markës “Benz”.

Vijon puna për identifikimin e pasurive të tjera që mund të ketë ky shtetas dhe personat e lidhur me të.

Ndaje me miqte