Athinë raund i ri negociatash midis qeverisë dhe kreditorëve

TRIBUNA 13 Shtator 2016

Në Athinë ka filluar një raund i ri negociatash midis qeverisë greke dhe përfaqësuesve të kreditorëve. Negociatat synojnë arritjen e një marrëveshjeje, që do t’i mundësojë Greqisë të marrë këstin e radhës të kredisë, në kohën që kreditorët paralajmërojnë se ky këst është i disponueshëm deri më 31 tetor. Në qendër të negociatave të tanishme ndodhen 15 detyra që duhet të realizojë urgjentisht qeveria greke dhe që lidhen kryesisht me luftimin e korrupsionit dhe privatizimet. Për disa prej këtyre çështjeve propozimet e deritanishme të qeverisë greke kanë hasur në rezistencën e fortë të kreditorëve, por në Athinë ka optimizëm se do të gjendet gjuha e përbashkët. Raundi i negociatave fillon për qeverinë greke me trysninë e mesazheve që dërguan ministrat e financave të eurozonës, nga takimi i tyre në Bratislavë, fundjavën e kaluar. Shefi i eurozonës, Jerun Dijsselbloem, tha se qeveria greke ka bërë një farë progresi, por theksoi se mbeten ende shumë për të bërë, me qëllim që të avancohet në disbursimin e këstit. Komisioneri për financat, Pierre Moscovici, tha se koha që u humb gjatë kësaj vere mund të fitohet në negociatat e tanishme. “U humb kohë, por është e qartë se këto vonesa mund të balancohen me intensifikimin dhe dhe përshpejtimin e negociatave”, deklaroi Moscovici duke shtuar se nuk nevojitet “dramatizimi i situatës”, pasi ekziston mundësia e finalizimit të negociatave brenda grafikut të caktuar. Deklarata më shqetësuese për Athinën është bërë nga Klaus Regling, drejtor i Mekanizmit Europian të Stabilitetit (ESM), që është dhe huadhënësi kryesor i programit të tretë të shpëtimit të Greqisë. Regling theksoi se ESM është i gatshëm në pikëpamje teknike që të avancojë në disbursimin e këstit, por e kushtëzoi këtë me plotësimin e gjithë kërkesave të tanishme nga ana e Athinës. Regling paralajmëroi që negociatat duhet të finalizohen deri më 31 tetor. Pas kësaj date kësti me vlerë 2,8 miliardë euro nuk do të jetë më i disponueshëm dhe Greqia mund ta humbasë. Megjithëse me vlerë më të vogël se shumë transhe të mëparshme, ky këst i kredisë është jashtëzakonisht i çmuar për qeverinë, por edhe për ekonominë greke. Më shumë se gjysma e këstit, ose 1,7 miliardë euro do të paguhen që shteti grek të shlyejë një pjesë të detyrimeve që ka ndaj biznesit privat dhe që aktualisht kapin vlerën 5,5 miliardë euro.

Ndaje me miqte