Cameron takime me homologët evropianë pas votës për Brexit

28 Qershor 2016

Kryeministri britanik David Cameron u takua të martën në Bruksel me presidentin e Komisionit Evropian, Jean-Claude Juncker, pa bërë komente për median. Ai do të takohet me secilin prej homologëve të tjerë evropianë para se të bëjë komente lidhur me vendimin e vendit të tij për t’u larguar nga Bashkimi Evropian. Pas votës historike të Britanisë për t’u larguar nga Bashkimi Evropian, udhëheqësit e BE-së janë duke diskutuar mbi një të ardhme pa Britaninë, duke i bërë thirrje asaj të largohet sa më shpejt nga blloku. Donald Tusk, President i Këshillit Evropian tha se BE-ja ka tashmë një plan pune dhe procedura të sakta. "Së pari dua të them se, duke respektuar vullnetin e votuesve britanikë, ne duhet të respektojmë gjithashtu traktatet tona dhe, sipas tyre, është qeveria britanike që fillon procesin e daljes nga BE-ja. Kjo është mënyra e vetme ligjore që kemi,” tha zoti Tusk. Zoti Tusk tha se udhëheqësit do të mbajnë një takim jozyrtar në muajin shtator: "Kemi nevojë për disa javë për të përgatitur këtë proces dhe ndoshta vendi më i mirë do të jetë Bratislava, sepse në atë kohë ne do të jemi nën kryesinë sllovake." Ndërkohë, sot në Parlamentin Evropian, Nigel Farage, kreu i Partisë së Pavarësisë në Mbretërinë e Bashkuar parashikoi se do të ketë edhe vende të tjera anëtare që do të ndjekin shembullin e Britanisë për t’u shkëputur nga blloku: “Do të bëj sot një parashikim: Britania nuk do të jetë shteti i fundit anëtar që largohet nga Bashkimi Evropian. ?ështja është, çfarë duhet të bëjmë tani? I takon qeverisë britanike të kërkojë zbatimin e nenit 50. E kam thënë dhe e them, nuk mendoj se duhet të shpenzojmë shumë kohë për ta bërë këtë.” Fjalimi i tij u fishkëllye dhe u ndërpre herë pas here. Duke marrë fjalën pas zotit Farage, Kryetarja e partisë franceze të ekstremit të djathtë, Marine Le Pen, e vlerësoi vendimin britanik: "Vota e miqve tanë britanikë për t’u larguar nga BE-ja, është absolutisht ngjarja më e rëndësishme politike në kontinentin tonë që nga rënia e Murit të Berlinit. Eshtë një fanar global për liri. Dhe një deklaratë dashurie nga populli i atij vendi.” Britania është përballur me thirrje të zemëruara nga udhëheqësit e tjerë evropianë, që vendi të veprojë shpejt për të zgjidhur kaosin politik dhe ekonomik që pasoi votimin për largim nga Bashkimi Evropian, vendim që sipas FMN-së do të jetë një trysni mbi rritjen globale.

Ndaje me miqte