Detaje të reja për takimin Rama Tsipras

Tribuna 26 Maj 2017

Me kthimin e kryeministrit Aleksis Tsipras në Athinë, kanë dalë në dritë më shumë detaje nga biseda që ai ka zhvilluar me kryeministrin shqiptar Edi Rama. Sipas burimeve pranë zotit Tsipras, -që janë cituar nga mediat vendase- kryeministri grek ka përshëndetur zgjidhjen e krizës politike në Shqipëri dhe kontributin e gjithë forcave politike të vendit për këtë qëllim. Tsipras gjithashtu nënvizoi mbështetjen e fuqishme të Greqisë për procesin e reformave në Shqipëri dhe rëndësinë që Athina i kushton respektimit të të drejtave të minoritetit grek që jeton atje. Sipas të njëjtave burime, dy kryeministrat theksuan lidhjet e ngushta historike, kulturore dhe ekonomike të të dy popujve, që janë intensifikuar dekadat e fundit. Aleksis Tsipras dhe Edi Rama nënvizuan se marrëdhëniet greko-shqiptare janë të natyrës strategjike, ndërsa shprehën mbështetjen e plotë ndaj dy ministrave të jashtëm për krijimin e një mekanizmi konsultimesh intensive me synim zhvillimin e mëtejshëm të marrëdhënieve dypalëshe. Paralelisht theksuan hapat e rëndësishëm që janë bërë në integrimin e emigrantëve shqiptarë në Greqi. Dy kryeministrat nënvizuan rolin e rëndësishëm të Greqisë në procesin e integrimit europian të Shqipërisë dhe ranë dakord që të forcojnë dialogun ndërmjet të dy vendeve lidhur me organizmat ndërkombëtarë.

Ndaje me miqte