E përmirësuar situata me zjarret në Atikë. Rrezikshmëri e madhe edhe të mërkurën
Tribuna
16 Gusht 2017
Situata e zjarreve në Atikë është paraditen e të mërkurës shumë më e mirë nga ditët e mëparshme. Sipas shërbimit zjarrfikës, aktualisht ka vetëm vatra të vogla, të cilat po menaxhohen, ndërsa skuadra zjarrfikës po veprojnë në zonën midis Kapandritit dhe autostradës, me qëllim që ta kufizojnë zjarrin e mos ta lejojnë të rrezikojë aksin rrugor.
Që në orët e para të mëngjesit, dy avionë dhe tre helikopterë po fluturojnë mbi vatrat e zjarrit duke hedhur ujë që të evitojnë riaktivizimin e tyre.
Gjithsesi, shërbimi zjarrfikës pret me shqetësim pasditen, kur intensiteti i erërave do të forcohet ndjeshëm.
Situata është vënë nën kontroll edhe në rrethin e Ilias, ku dje ishte evakuuar fshati Peristeri, ndërsa një helikopter po patrullon dhe po kryen hedhje uji, me qëllim parandalimin.
Sipas shërbimit të emergjencave civile (Politiki Prostasia), edhe e mërkura, 16 gusht, është një ditë me rrezikshmëri të lartë, sa i përket mundësisë së shpërthimit të zjarreve.
Zonat me rrezikshmëri më të lartë (niveli 4), janë:
-Periferia e Atikës
-Periferia e Greqisë Kontinentale (Viotis, Evia),
-Periferia e Peloponezit (Korinth, Argolidha),
-Periferia e Kretës,
-Periferia e Egjeut Verior (Lesvos, Hios, Samos, Ikaria),
-Periferia e Egjeut Jugor.
Ndaje me miqte