Gjermania &ldquoprish syrin e keq&rdquo dhe gjunjëzon Italinë në penallti
03 Korrik 2016
Pas një ndeshjeje tronditëse që zgjati më shumë se 120 minuta, Gjermania gjunjëzoi italianët, pas një procedure të tejzgjatur penalltish (6-5), duke u kualifikuar për në gjysmëfinalet e Euro 2016. Eshtë hera e tretë që “Azzuri”-t eliminohen në këtë mënyrë nga vazhdimi i kampionatit europian.
Gjermanët do të ndeshen më 7 korrik me fituesen e çiftit Francë-Islandë.
U desh të gjuheshin plot 18 penallti që Gjermania të prishte traditën, apo më mirë “syrin e keq” dhe të triumfonte ndaj Italisë.
“Pancerat” kaluan në avantazh në minutën e 65-të, por 13 minuta më vonë Bonucci barazon, pas një penalltie që shkaktoi Bateng.
Gjermanët e filluan lojën nën peshën e traditës që nuk i favorizonte aspak, pasi kurrë më parë nuk i kishin fituar italianët në një turne final. Në tetë ndeshje kishin katër barazime dhe po kaq humbje.
Loja ishte tepër e mbyllur, me dy kundërshtarët të tregonin hapur se i druheshin njeri-tjetrit. Përndryshe, rasti i parë që ia vlente, u shënua në minutën e 43-të, kur pas një lëmshi në portën italiane, topi mbërriti në këmbët e Thomas Muller, i cili gjuajti “për laraska”!
Një minutë më vonë ishte radha e Italisë që të mbërrinte pranë golit, por gjuajtja e tij u devijua në goditje këndi.
Në pjesën e dytë Gjermania u mundua të jetë më krijuese dhe në minutën e 54-t humbi një rast ideal, kur pas gjuajtjes së Gomez, Florenzi e hoqi topin nga vija fatale.
Gjithsesi, presioni i gjermanëve i dha frytet e veta, në minutën e 65-të. Gomez pasoi shkëlqyeshëm te Hector; ky i serviri një top Ozilit i cili vetëm 5 metra përballë Bufonit nuk e pati të vështirë ta shtynte topin në rrjetë.
Në 74’ Italia humbi rastin e parë në pjesën e dytë. Pelle kreu një gjuajtje brenda zonës, por topi kaloi jashtë. Tre minuta më vonë, Florenzi krosoi në zonë, gjuajtja me kokë e Chielinit përfundon në dorën e Boateng dhe... penallti! Gjuan Bonucci dhe shënon, edhe pse Neuer u hodh në krahun e duhur. Ky ishte goli i parë që pësuan “pancerat” në Euro 2016.
Italianët e ngritën ritmin pas barazimit dhe për pak shënuan pas një kundërsulmi të bukur, ku Pele mori një pasë nga Eder dhe gjuajti fort, por jo kaq mirë sa duhej.
Minutat e mbetura nuk sollën ndryshim rezultati dhe loja shkoi në shtesë 2 x 15 minuta.
Pavarësisht dominimit gjerman, që kulmoi me një rast mjaft të pastër të Draxler-it në 107’, fati i kualifikimit do të vendosej në gjuajtjet nga pika e 11 metërshit...
Aty u duk qartë se të gjithë lojtarët ndodheshin në një stres të jashtëzakonshëm. Kur përfundoi seti i parë i nga pesë gjuajtjeve, rezultati ishte i barabartë dhe prandaj u vazhdua, derisa i erdhi radha Josua Hector-it, pasi Damian kishte humbur penalltinë e katërt për italianët. Megjithëse Buffon e kuptoi krahun, topi i kaloi nën sqetull dhe në këtë mënyrë u vulos dhe finalja e kësaj supersfide të madhe: gjermanët vazhdojnë rrugën drejt titullit të ëndërruar, ndërsa italianë marrin rrugën e kthimit për në shtëpi.
Penalltitë
Gjermania
Toni Kroos (+)
Thomas Müller(-)
Mesut Özil (-)
Julian Draxler (+)
Bastian Schweinsteiger (-)
Mats Hummels (+)
Joshua Kimmich (+)
Jérôme Boateng (+)
Jonas Hector (+)
Italia
Lorenzo Insigne (+)
Simone Zaza (-)
Andrea Barzagli (+)
Graziano Pellè (-)
Leonardo Bonucci (-)
Emanuele Giaccherini (+)
Marco Parolo (+)
Mattia De Sciglio (+)
Matteo Darmian (-)
E shtunë, 2 korrik, 2016, Stade de Bordeaux - Bordo
Gjermania (3-5-2): Neuer; Howedes, Boateng, Hummels; Kimmich, Khedira (Schweinsteiger 16 ), Kroos, Ozil, Hector; Muller, Gomez (Draxler 72).
Gol: Ozil 65
Karton i verdhë: Hummels, Schweinsteiger
Trainer: Joachim Low9
Italia (3-5-2): Buffon; Barzagli, Bonucci, Chiellini (Zaza 120); Florenzi (Darmian 86), Sturaro, Parolo, Giaccherini, De Sciglio; Pelle, Eder (Insigne 108).
Gol: Bonucci 78
Karton i verdhë: Sturaro, Parolo, Giaccherini, De Sciglio, Pelle
Trainer: Antonio Conte
Gjyqtar: Viktor Kassai (Hungari).
Tribuna
Ndaje me miqte