Liderë botërorë të pranishëm në funeralin e Shimon Peresit

TRIBUNA 30 Shtator 2016

Udhëheqës nga e gjithë bota ishin të premten në Jeruzalem për funeralin e ish-presidentit izraelit, Shimon Peres. Arkivoli i Peresit mbërriti në varreza nga parlamenti, ndërkohë që njerëzit filluan të zinin vendet e tyre në varrezat kombëtare të qytetit para se të fillonte ceremonia dhe fjalimi i përmortshëm Këngë hebreje vajtimi dhe lutje u kënduan ndërkohë që roja nderi vendosën arkivolin në makinë. “Rreth 3 000 vetë morën pjesë në varrim”, thanë anëtarët e familjes. Presidenti amerikan, Barack Obama mbërriti herët në mëngjes me ”Air Force One” në aeroportin ndërkombëtar në Tel Aviv për të marrë pjesë në funeralin e ish-presidentit dhe nobelistit, Peres. Presidenti palestinez, Mahmoud Abbas dhe një delegacion i Autoritetit Palestinez erdhën nga Ramallahu pas marrjes së lejes nga autoritetet izraelite. Ish-presidenti amerikan, Bill Clinton, i cili kryesoi administratën gjatë përpjekjeve për të vendosur paqen në Lindjen e Mesme gjatë viteve ’90 të shekullit të kaluar, ishte i pranishëm. Udhëheqës të tjerë morën pjesë në funeral, duke përfshirë presidentin gjerman, Joachim Gauck, presidenti francez, Francois Hollande dhe kryeministri kanadez, Justin Trudeau. Ministria e Jashtme izraelite tha se 20 presidentë dhe 15 ministra të Jashtëm janë në ceremoni. Peres vdiq të mërkurën, në moshën 93-vjeçare. Arkivoli i Peresit u vendos dje para ndërtesës së parlamentit për një ceremoni shtetërore, që filloi me vendosjen e kurorave të kryeministrit izraelit, Benjamin Netanyahu dhe presidentit, Reuven Rivlin,para se të lejohej publiku që t’i jepnin lamtumirën. Dhjetëra mijëra njerëz ndenjën në radhë për t’i dhënë lamtumirën ish-presidentit, Peres. Ish-presidenti izraelit dhe çmim Nobel i Paqes, Shimon Peres, vdiq në moshën 93 vjeçare pas një aksidenti vaskular dhe cerebral, njoftoi mjeku i tij personal, Rafi Walden. Me Shimon Peres zhduket një figurë historike, i mbijetuari i fundit i gjeneratës së baballarëve themelues të shtetit të Izraelit dhe një nga artizanët kryesore të marrëveshjeve të Oslos që hodhën bazat e një autonomie palestineze në vitet 1990 dhe që i sollën dhe çmimin Nobel të Paqes.

Ndaje me miqte