Mbahet në Selanik takimi i ministrave të jashtëm e të brendshëm të rajonit

Tribuna 05 Tetor 2017

Zhvillimet gjeopolitike në Ballkan dhe promovimi i mëtejshëm i bashkëpunimit rajonal, do të jenë në fokus të ministeralit dyditor që i fillon punimet të enjten paradite në Selanik. Në takim do të marrin pjesë ministrat e jashtëm dhe të brendshëm të Greqisë, Shqipërisë, Bullgarisë dhe Maqedonisë, si dhe zyrtarë nga ministritë respektive të energjisë. Sipas palës greke, takimi synon të sanksionojë një bashkëpunim institucional ndërmjet vendeve të rajonit për terma me rëndësi strategjike si, sfidat në çështjet e sigurisë, përballimit të ekstremizmit dhe terrorizmit, krimit të organizuar, por edhe pasojave të krizës së refugjatëve, që në njerën apo tjetrën mënyrë vazhdojnë të kenë impakt në gjithë shtetet ballkanike. Gjithashtu do të shqyrtohen mundësitë e bashkëpunimit të mëtejshëm, në çështje si lufta kundër zjarreve apo siguria energjitike dhe promovimi i interkonjeksioneve të energjisë. Ky është ministerali i dytë i katër shteteve, pas atij të zhvilluar po në Selanik, në prill të vitit të kaluar. Atëherë nga Shqipëria kishin marrë pjesë ministri i jashtëm Ditmir Bushati dhe ai i brendshëm, Saimir Tahiri. Ministeralet me këtë format mëtojnë të përçojnë mesazhin se forcimi i stabilitetit dhe sigurisë në Ballkan mund të garantohen më mirë përmes zhvillimit të sinergjive dhe bashkëpunimit rajonal.

Ndaje me miqte