Për librin e poetes Brikena Qama: &ldquoTitulli i kujtimeve të mia&rdquo
25 Shkurt 2016
Më duhet të pranoj që në fillim se nuk më qe e lehtë të shkruaj për këtë libër, megjithë dëshirën e mirë që mund të kisha të shkruaja për poeten dhe njeriun Brikena. Dhe arsyet janë të shumta dhe të ndryshme.
Kryesorja është se një libër i tretë për një autor është një libër shumë, shumë i rëndësishëm sipas mendimit tim.
Një libër ku, njerëzit që të duan të mirën duhet të marrin lupën; dhe vetë krijuesi a krijuesja, të mendohet mirë, gjatë, qetë dhe me përgjegjësi përse shkruan. Kështu mendoj unë dhe në krijimtarinë time, ky ishte një stacion që do e mbaj mend me mirënjohje, por të tilla filozofi e ballafaqime ndoshta i shkojnë për shtat më tepër ndonjë seminari mbi këndvështrimin ideal të poezisë nga secili ne dhe filtrat tona perceptuese. Në fund të fundit gjithësekush flet më tepër se me zemër, nëpërmjet tyre, ( ndërkohë që poezia, vetëm me zemër mund të kuptohet, vetëm me zemër mund të shkruhet dhe vetëm për dhe prej, ndjenjave ekziston). Kështu që, e vërteta është, që ashtu siç vetë jeta, këto filtra s’duhen marrë dhe aq seriozisht.
Pastaj dhe vetë koha është tërësisht një fuqi e madhësi reciproke për secilin, dhe kësisoj ndoshta, asnjëherë s’ do të binim në një mendje.
Prandaj vendosa përfundimisht, të “konvertoj” në fjalë përçuese, ndjenjat që më zgjoi kjo krijesë e re poetike, duke hedhur tej lupat dhe lapsin e kuq, që na bën aq narcisian.
“Titulli i kujtimeve të mija” vjen plot “premtime” që në kopertinë, për lexuesin, has në një terren të dyzuar për rolin e përgjithshëm të poezisë sot dhe në fund e kupton se ndoshta të ka dhënë më shumë seç ishte qëllimi i një pasditeje poetike. Të ka dhënë lirinë për të gjykuar konceptin mbi realitetin e gjithësecilit, por dhe mbi realitetin konfuz e të bukur jetik të vetë autores, që po të duam ndonjë herë të perifrazojmë botën, të bukurën dhe artin, kështu, hedhim vështrimin në një dritare më shumë, nga dhomëza jonë shumekëndëshe, e ndjejmë të nevojshme të pajisemi edhe me vetëdijen e tjetrit, edhe të Brikenës, për angazhimin personal në shpjegimin tonë filozofik e artistik të secilit, për Të Plotën. Ky është roli i poezisë në prioritet, ky është kulti i saj që e bënë aq joshëse për sytë e artistit, sipas vizionit tim.
Libri kalon sprovën e “përmirësimit të dorës, së mjeshtrit” në lidhje me krijimtarinë e më parëshme të Qamës dhe poetja me përzgjedhjet e saj grafike të minimalizimit të shenjave të pikësimit, të ndarjes së vargjeve në fund të rreshtave dhe mos përdorimi i gërmave kapitale (çuditërisht as në emrat e përvetshëm) me titujt në poezitë e saj përgjithësisht të avancuar mentalisht, por dhe të rinjë në lidhje me penën e saj të deritanishme sidomos kur bëhen varg i munguar i vetë poezisë si dhe me gjuhën stilistike e figurative vazhdon të njëjtën mënyrë identifikimi që ka gjetur për t’ju bashkangjitur poezisë e afrohet më pranë lirikës moderne të ushtruar dhe mëtimeve që kishte nisur në libin e saj të dytë, megjithese ende luhatet në valezimin e një poezie në krijim, që s’ kemi pse e pagëzojmë në mënyra strikte, a rendisim përveç se me lirinë karakteristike të të këndshmes, në sens, apo vetë harmonisë që poetja ka krijuar me lirinë.
Në këtë kuadër vjen dhe pasurimi vizual i një misioni simbolik dhe përforcues, por për fatin e mirë, poezia e Brikenës ka më pak vendosmëri dhe më shumë ngatërresë feminile që të ngjan me naze filozofike, kështu që loz me lexuesit në fasadat e mendimit, paçka se ndonjëherë përsëritet, apo stimulon.
E sigurt, ama, është që nuk përgjumesh, pasi merr e jep ngjyrime e shtjellime interesante që nuk treten në ftillimet e harresës edhe kohë më pas.
Fluturim të mbarë krijesës së re artistike që na erdhi në duar, secili nga ne gjen një pjesë të bukur të vetes brenda dhe i gëzohet frymëzimit që ka përçuar.
Armela HYSI
Një cikël poetik nga vëllimi
“E kish fajin hëna”
Në s’do të ishte kështu
qielli,
deri para pak i dukshëm për sytë
nuk do ti ngjante një kavalete
vendosur me përpikmëri
mbi kokat tona.
Nuk do të ishte
as ajo “mollë e plotë”
që trupat i bëri njësh me hijet
dhe pendimin
e la të priste ndanë rrugës
zgërlaqur prej kripës e jodit.
E, ç’t’i bësh kujtimit,
futur në guaskë
fjetur xhepit të fshehtë
që prej verës së shkuar.
Keni shkuar në Prishtinë?
-ku shiu nuk harron
të lëmojë vragat e kohës,
-ku njerëzit ecin me kokën lart
e vështrimin e hedhin tej qiellit,
-ku poetët u këndojnë
heronjve e vashave,
-ku loti ka të njëjtën peshë
në hare e hidhërim,
-ku gjithkush të thotë
Mirëserdhe në Prishtinë!
Përtej vrimës së çelësit
Ndër gishta, akoma
mbante përdredhur
rruzaren e perltë,
dhuratë e një tjetër patosi
të saposhterur.
Ju desh kohë
të përzërë dremitjen
e të gjejë rrugën
drejt rubinetit zhurmues
që s’ndalte së pikuari.
Para se të hapte kanatat e drunjta të grilave,
tërhoqi shkaraz
cepin e këmishës (mbërthyer vëngër)
e mbuloi instiktivisht pubisin.
Në kthim
vendosi me kujdes rruzaren
në sendukun ku mbante kyçur
hiret e saj.
Klinikisht i vdekur
do mendim i imi
ka qënë një profeci.
Këtij të fundit,
ia kam frikën.
Eshtë ai tis bulëzash
ndërmjet nesh
që lag vështrimin
e i zmadhon tmerrshëm largësitë.
Veç të tjerash
Kur të nisesh për në parajsë
të të jap dua me vete
një kutizë ëndrrash tokësore.
Atë që nuk pata guximin ta hap
sa të kisha pranë.
-livadhet e pyjet
që kurrë nuk i shkelëm.
-detet
që kurrë nuk i lundruam.
-strehëzat ku mendoja
të fshihnim puthjet prej shiut.
-rënqethjet e përmbajtura
prej ankthit të ikjes
(orës një pas mesnate).
-marrosjen e shpirtit endacak
në kërkim të aromës tënde...
’gjallesë e rëndomtë!
Akoma besoj se do të të mungoj.
Si është të biesh nga kati i 36-të
“Llampa magjike” kësaj radhe
vajoset se jashtëmi,
rrëshqet duarve
pa arritur të them dëshirën
prej së cilës jam mbarsur që në lindje.
Thërrmohet në këmbët e mia
me tingull që tremb britmën e habisë.
Nuk arrita të ndjehem Aladin
As xhindin nuk munda ta liroj.
Nga ky çast
do kem të merrem e ciflat majemprehta,
pasqyrimet e mia mikroskopike.
Duke të pritur
Vetmia depërton
vrimave të kafkës.
Përjashtet me zhurmë
mureve që më zënë frymën.
Mos t’u duket çudi!
Ajo ka tingull, tik - takun e orës,
lëviz, në dridhjen e neonit,
fërshëllen, daljes së ibrikut,
vjen në duart e mia të akullta,
përdridhet gishtrinjve
me rradhitje të papërcaktuar.
Së fundmi,
e shushatur,
rrumullakoset kufijve
së dhomës nga ku nisi.
E pa arsye edhe këtë herë.
Erdhe!
Nuk e mbaj mënd si ishte
Kur s’ishe
(Erotokritos)
Sa më merr malli
të të puth cepin e syrit
nga ku më vështron tinëz
sa herë të afrohem me krahët e hapur
për të të mbështjellë të tërin.
Dhe kur bën sikur s’më sheh,
kinse të tërheq vëmëndjen më tepër
“supërnjeriu” në ekranin e TV,
injoroj gjithçka përreth....
E ndërmjetme
Paralajmërimi i fundit
para mbylljes hermetike
të burimit të dritës.
Diagrama e mendimit
lëshon dihatjen përcjellëse.
Përsëri kjo shtëpizë!
E vogël
për strehim ëndrrash.
E huaj
për të mirëpritur shpresën...
Thur përditë një ëndërr
Nuk është se i marrem
shpërthimit të sekrecioneve,
mbledhur enkas për mua.
Mbartjes së gjenetikës tënde
poreve,
mbufatur prej dëshirës.
Por erosi
nuk konservohet zarfeve!
Ai, është epshor i pabesë!
Harrohet ishujve të lëngëzuar
rrugës për te unë.
E unë, vejusha,
pres ngadhënjyeshëm
rrëshqitjen e prekjes së pabesë
lakimeve të siluetës sime.
Pranverë
Një tjetër përrallë...
Veshur,
një fustan të purpurt.
Në flokë,
një kordele rozë.
Në sy,
sekretin e natës së shkuar.
Në duar,
kukullën e fëmijërisë
(që ndërron emër çdo ditë)
Centrifugoj këtë përzierje
poshtë bajames së lulëzuar
e shiut të petaleve
pas lojës me erën çapkëne.
Sipër saj,
hëna rrumbullakoset ngadalë.
Endrra ime ishe gjithmonë ti
Me këtë trup e hije.
Me këta sy e vështrim.
Me këto buzë e puthje.
Me këto duar e prekje.
Me këto këmbë e hapa
të ngadaltë
që shkelin butë renë time roz.
E nëse më sheh gjithmonë të përgjumur,
Eshtë se hapja e syve
do të më kushtojë shtrenjtë.
Ndaje me miqte