FBI-ja bastis shtëpinë e analistit politik Dmitri Simes në Virxhinia

Tribuna News 17 Gusht 2024

FBI-ja ka kryer një bastisje dhe kontroll në shtëpinë e Dmitri Simes, një analist politik me lidhje të ngushta me Rusinë, i cili është gjithashtu autor i një emisioni për çështje aktuale në televizionin shtetëror rus, Channel One, raportoi gazeta Rappahannock News të premten.

 

Simes, i cili ndodhet jashtë vendit, deklaroi për gazetën se është "i shqetësuar dhe i habitur" nga aksioni i FBI-së.

 

I lindur në Moskë në vitin 1947, Simes emigroi në Shtetet e Bashkuara në vitin 1973. Ai ka shërbyer si këshilltar joformal për ish-presidentin amerikan Richard Nixon, duke e shoqëruar atë në udhëtime të rregullta në Rusi dhe ish-republikat sovjetike. Në vitin 1994, Nixon e emëroi kryetar të Qendrës për Interes Kombëtar, e njohur atëherë si Qendra e Nixonit për Paqe dhe Liri, pozitë të cilën Simes e mbajti deri në vitin 2022.

 

Simes ka qenë gjithashtu këshilltar në fushatën presidenciale të Donald Trump më 2016 dhe ishte organizatori i një fjalimi të rëndësishëm për politikën e jashtme, ku Trumpi shpalosi vizionin e tij për bashkëpunim më të madh me Rusinë. Emri i Simes u përmend më shumë se 100 herë në raportin e vitit 2019 të prokurorit të përgjithshëm amerikan, Robert Mueller, mbi ndërhyrjen ruse në zgjedhjet presidenciale të vitit 2016.

 

Së fundmi, Simes moderonte një sesion pyetje-përgjigje me presidentin rus Vladimir Putin në Forumin Ekonomik Ndërkombëtar në Shën Petersburg në vitin 2023.

 

Ndaje me miqte