Greqia mori gati 290 miliardë euro kredi në tetë vitet e krizës

Tribuna TV 20 Gusht 2018

Sipas të dhënave të mekanizmit Europian të Stabilitetit, Greqia ka marrë gjatë tetë viteve të krizës kredi me vlerë të përgjithshme 288,7 miliardë euro.

Nga këto: 203,8 miliarde euro janë marrë prej EFSF (Fondi Europian i Stabilitetit Financiar) dhe ESM; 52,9 miliardë prej kredive dypalëshe me shtetet anëtare të Eurozonës dhe 32,1 miliardë janë dhënë nga Fondi Monetar Ndërkombëtar.

Sa i përket shlyerjes, kreditë e dhëna nga ESM do të shlyhen nga 2034 deri në 2060, ndërsa ato të EFSF ishte planifikuar që të shlyheshin në periudhën 2023 – 2056, por ndërkaq do të zbatohet një shtyrje dhjetëvjeçare.

Siç vë në dukje ESM, masat afatmesme pritet të garantojnë qëndrueshmërinë e borxhit grek në skenarin bazë. Ndërsa implementimi i një strategjie ambicioze zhvillimi ekonomik dhe politikave korrekte fiskale nga ana e qeverisë greke, do të jenë komponentët kryesorë me qëllim që borxhi të mbahet në nivele normale.

Gjithashtu, Eurogrupi ka rënë dakord që të rishqyrtojë periudhën e amnistisë për kredinë e EFSF, në vitin 2032, në rast se do të nevojiten masa shtesë për borxhin.

Ndaje me miqte