Kanadaja rrëzon një objekt ajror të dyshimtë

ATSH 12 Shkurt 2023

UASHINGTON, 12 shkurt /ATSH-DPA/ – Kryeministri kanadez, Justin Trudeau deklaroi se Komanda e Mbrojtjes së Hapësirës Ajrore të Amerikës së Veriut (NORAD) rrëzoi një objekt të paidentifikuar që shkeli hapësirën ajrore të vendit.

Trudeau tha se ai urdhëroi rrëzimin e objektit duke shtuar se ai u qëllua nga NORAD mbi Yukon, një territor në kufi me Alaskën, në veriperëndim të Kanadasë.

“Një F-22 amerikan qëlloi me sukses në objekt”, tha ai në një postim në Twitter.

Trudeau tha se kishte folur me presidentin amerikan, Joe Biden dhe se Forcat Kanadeze tani do të rimerrnin dhe analizonin rrënojat e objektit.

Të premten pasdite, NORAD, një forcë e përbashkët kanadeze-amerikane, rrëzoi një objekt ajror në lartësi të madhe të veçantë në brigjet veriore të Alaskës brenda ujërave territoriale të SHBA.

Autoritetet amerikane po kryenin operacione kërkimi dhe rikuperimi.

Ngjarjet vijnë një javë pasi zyrtarët amerikanë rrëzuan një balonë të dyshuar kineze mbikqyrjeje në brigjet e Atlantikut të Karolinës së Jugut, që mendohej se po mblidhte informacione rreth armëve në SHBA.

Uashingtoni akuzoi Pekinin për përdorimin e tij për qëllime vëzhgimi pasi avioni u zbulua mbi hapësirën ajrore të SHBA.

Pekini këmbënguli se balona ishte një avion civil dhe pohoi se rrëzimi i Uashingtonit ishte një “reagim i dukshëm i tepruar”.

Pekini argumentoi se balona shërbente për “qëllime civile” dhe tha se avioni kishte devijuar nga kursi dhe ishte i vështirë për t’u manovruar.

Sekretari amerikan i Shtetit, Antony Blinken anuloi një udhëtim të planifikuar në Kinë, çka ka rritur tensionet, në një marrëdhënie tashmë të tensionuar.

Në fillim të kësaj jave, Kina gjithashtu pranoi se një balonë e madhe, e zbuluar mbi Kolumbi, i përkiste Pekinit.

Ndaje me miqte