Kthimi i qirasë: Përfituesit mund të informohen në linjën 1521 – Ata që dorëzojnë deklaratë korrigjuese deri më 12 dhjetor do të paguhen deri më 30/12

Tribuna News 02 Dhjetor 2025

Koha e leximit: 1'40"

Që nga sot, e martë (2/12), përfituesit e kthimit të qirasë mund të telefonojnë linjën 1521 të Administratës Tatimore (AADE) nëse kanë nevojë për ndonjë sqarim pas problemeve që kanë shfaqur pagesat.

 

Gjithashtu, qytetarët mund të marrin informacion për subvencionin e qirasë që kanë marrë duke kontaktuar të njëjtën linjë.

 

Qiramarrësit që kanë marrë shumë pak ose aspak kthim qiraje kanë mundësi të dorëzojnë deklarata korrigjuese deri më 30/12/2025.

 

Gjatë verifikimit të kthimit të qirasë u identifikuan mijëra deklarata ku ishte shkruar qiraja mujore në vend të asaj vjetore. Si rezultat, AADE kreditoi në llogaritë bankare të përfituesve vetëm 1/12 e qirasë mujore, duke shkaktuar pagesa të ulëta, rreth 20-30 euro.

 

Rreth 30,000 qytetarë nuk kanë marrë kthimin e qirasë pasi nuk kishin deklaruar IBAN-in e tyre.

 

Sipas të dhënave të AADE, përfituesit që dorëzojnë deklaratë korrigjuese deri më 12 dhjetor do të paguhen deri më 30/12, ndërsa deklaratat e dorëzuara deri në fund të vitit 2025 do të paguhen deri më 15 janar 2026.

 

Përfaqësues të Ministrisë së Ekonomisë dhe Financave dhe AADE theksuan se shumica e pagesave janë kryer normalisht, por janë regjistruar gabime të veçanta për shkak të plotësimit të gabuar të kodëve në formularin E1.

 

Deklarata e Ministrisë së Ekonomisë dhe Financave:

 

“Ministria e Ekonomisë dhe Financave dhe AADE njoftojnë se kthimet automatike të qirasë që janë kredituar në llogaritë e përfituesve bazohen në shumat e qirasë që janë deklaruar nga vetë qiramarrësit në deklaratat tatimore për vitin fiskal 2024. Në disa raste janë regjistruar pagesa më të ulëta për shkak të deklarimit të gabuar ose të paplotë të shpenzimeve vjetore të qirasë nga qiramarrësi.

 

Subvencioni llogaritet mbi shpenzimin vjetor të qirasë për vitin 2024, si për banesën kryesore (kodet 811 deri 816), ashtu edhe për banesën studentore të fëmijëve (kodet 817 deri 822). Kthehet vetëm shuma e deklaruar si e paguar dhe e verifikuar përmes të dhënave të kontratës elektronike të qirasë.

 

Për shkak se masa zbatohet për herë të parë, qytetarët patën mundësinë të korrigjonin të dhënat e tyre deri më 30 shtator. Megjithatë, u identifikuan raste ku qytetarët nuk korrigjuan deklaratat e gabuara. Për këtë arsye, tani jepet mundësia e dytë për korrigjim përmes dorëzimit të deklaratës korrigjuese E1 deri më 30 dhjetor 2025. Pas verifikimeve të parashikuara, do t’u shpërndahet përfituesve shuma shtesë që u takon.

 

Deklaratat korrigjuese të dorëzuara deri më 12 dhjetor do të paguhen deri më 30 dhjetor, ndërsa ato të dorëzuara deri më 30 dhjetor do të paguhen deri më 15 janar 2026.

 

Përfituesit që nuk kanë deklaruar IBAN-in e tyre duhet ta bëjnë këtë menjëherë për të përfunduar pagesën. Ministria thekson se nuk është e mundur të jepet subvencion për qira të paplota dhe se regjistrimi i saktë i shpenzimeve reale të qirasë është kusht i domosdoshëm për zbatimin e saktë të masës dhe mbrojtjen e interesit të qytetarëve.”

 

 

Ndaje me miqte