Kyriakos Mitsotakis betohet si kryeministër i Greqisë

TV TRIBUNA 08 Korrik 2019

Kyriakos Mitsotakis është betuar si kryeministri i ri i vendit dhe nesër pritet të shpallë qeverinë e tij.

Betimi u krye para presidentit të Republikës Helenike, Prokopis Pavlopoulos dhe kryepeshkopit Ieronimus.

Më pas, Mitsotakis u drejtua në Megaro Maksimu, ku kryeministri në largim, Aleksis Tsipras i bëri dorëzimet.

Rezultatet përfundimtare të votave që u shpallën mesditën e të hënës, kanë konfirmuar fitoren bindëse të konservatorëve që rikthehen në pushtet pas katër vitesh e gjysmë.

Demokracia e re ka fituar 39,85% të votave dhe merr 158 vende në parlament, ndërsa Syriza e Aleksis Tsiprasit, 31,5% dhe 86 vende.

Duke dalë nga pallati presidencial, pas kryerjes së betimit, Mitsotakis deklaroi se populli i dha partisë së tij një mandat të fuqishëm për të ndryshuar Greqinë.

“Nga sot fillojmë punën fort. Kam besim të plotë në kapacitetet tona që të qëndrojmë në lartësinë e detyrës”, shtoi kryeministri i ri grek.

Ndaje me miqte