Bashkimi Europian ka vendosur të lejojë udhëtimet e qytetarëve shqiptarë në vendet e Unionit, pas më shumë se një viti që kjo ndalohej për shkak të masave anticovid.
Ambasadorët e 27 vendeve anëtare kanë miratuar të mërkurën një listë të shkurtër shtetesh, qytetarët e të cilëve tashmë mund të udhëtojnë drejt BE-së edhe për turizëm.
Lista përbëhet nga Shtetet e Bashkuara, Shqipëria, Maqedonia e Veriut, Serbia dhe Libani.
Lajmin e ka konfirmuar për agjencinë Reuters një burim diplomatik në Bruksel.
I njëjti burim ka thënë se vendimi do të fillojë të zbatohet ditët e ardhshme.
Ende nuk ka njoftime për modalitetet përkatëse.
Por mund t’u lihet në dorë vendeve anëtare nëse do të kërkojnë test negativ PCR apo karantinë për turistët nga këto shtete.