Ministri i jashtëm grek viziton Tiranën

TV TRIBUNA 11 Nentor 2020

Ministri i jashtëm i Greqisë, Nikos Dendias, do të ndodhet të martën në Tiranë, në vizitën e tij të parë zyrtare në kryeqytetin fqinj.

Vitin e kaluar, Dendias kishte shkuar në Shqipëri, fill pas tërmetit të 26 nëntorit, për të shprehur solidaritetin e Athinës.

Vizita e tanishme inkuadrohet në përpjekjet për rifillimin e dialogut dypalësh për zgjidhjen problemeve të mbartura, dialog që ka ngrirë prej më shumë se dy vjetësh.

Fillimisht, shefi i diplomacisë greke do të takohet me ministrin në detyrë për Europën dhe punët e jashtme, Gent Cakaj.

Sipas njoftimit të ministrisë së jashtme greke, bisedimet do të fokusohen në çështje me interes dypalësh, europian dhe rajonal, me theks në ecurinë e marrëdhënieve greko-shqiptare, zhvillimet në Mesdheun Lindor dhe perspektivën europiane të Ballkanit perëndimor.

Muaj më parë, kryeministri grek, Kyriakos Mitsotakis, duke paralajmëruar vizitën e zotit Dendias në Tiranë, e kishte ndërlidhur me diskutimet për delimitimin e zonave detare ndërmjet të dy vendeve.

Më pas, ministri i jashtëm grek do të pritet nga kryeministri Edi Rama dhe presidenti i Republikës, Ilir Meta.

Gjatë qëndrimit të tij në Tiranë, Nikos Dendias do të takohet edhe me kryetarin e partisë demokratike Lulzim Basha dhe atë të partisë bashkimi për të drejtat e njeriut, Vangjel Dule. Ministri i jashtëm grek do të takohet edhe biznesmenë grekë që kanë aktivitet në Shqipëri, si dhe me kryepeshkopin e kishës ortodokse, Anastas.

Ndaje me miqte