Mitsotakis për mos hapjen e negociatave: “Zhvillim jo i mirë”

TV Tribuna 19 Tetor 2019

Greqia do të vazhdojë të mbështesë Shqipërinë dhe Maqedoninë për anëtarësim në familjen europiane dhe në të njëjtën kohë fton vendet anëtare të bashkëpunojnë për të konkretizuar këtë perspektivë.

Ministria e jashtme greke, thekson në një deklaratë për shtyp se mbështetja e vendeve të Ballkanit perëndimor është një nga akset e patjetërsueshme të politikës së jashtme të Athinës.

“Greqia do të vazhdojë të mbështesë përpjekjet e vendeve të rajonit për të realizuar reformat e kërkuara... Në të njëjtën kohë i fton vendet anëtare të Bashkimit Europian të bashkëpunojnë për konkretizimin e perspektivës europiane të Ballkanit Perëndimor në dobi të rajonit, por edhe të vetë Europës”, thuhet në deklaratën e ministrisë së jashtme greke.

Deklarata e ministrisë së jashtme greke vjen si një reagim ndaj mungesës së vendimit për Shqipërinë dhe Maqedoninë e Veriut, në samitin europian të së premtes.

Vetë kryeministri grek, KyriakosMitsotakis, ka komentuar se ky nuk është një zhvillim i mirë për rajonin, por edhe për vetë Greqinë.

Sipas zotit Mitsotakis, arma kryesore që ka Greqia për trajtimin e problemeve me të dy vendet, është perspektiva europiane e tyre.

“Konsideroj se nuk është një zhvillim i mirë, as në përgjithësi për stabilitetin e Ballkanit, por as për vetë Greqinë.

Sepse arma kryesore që ka Greqia me qëllim që të trajtojë probleme që ka me këto dy vende, ka të bëjë me perspektivën europiane të tyre.

Sa më afër një kursi europian të ndodhen këto dy vende, aq më shumë na jepet mundësia në kuadër të ndryshimeve që po bëjnë këto vende për të ardhur më pranë familjes europiane, të trajtojmë edhe probleme që ne kemi në planin dypalësh”.

 

Greqia mbështet në vazhdimësi perspektivën europiane të vendeve të Ballkanit Perëndimor.

Në perspektivë që ka si pikënisje samitin e Selanikut 2003, dhe ku Greqia ka qëndruar në mënyrë konstante për krah, në emër të konsolidimit të stabilitetit rajonal dhe të sigurisë.

Ky qëndrim, siç u theksua edhe nga kryeministri grek, KyriakosMitsotakis, në samitin e fundit të BE-së, mbetet një nga akset kryesorë dhe të pandryshueshëm të politikës së jashtme greke.

Greqia do të vazhdojë të mbështesë përpjekjet përkatëse të vendeve të rajonit për të përmbushur kushtet e nevojshme, me qëllim të anëtarësohen në familjen tonë europiane.

Për arritjen e këtij objektivi, i inkurajon të mbeten të përkushtuara në rrugën e reformave që vetëm pozitivisht mund të influencojnë procesin e përafrimit të tyre me Bashkimin Europian, por edhe jetën e qytetarëve të tyre.

Paralelisht, Greqia fton vendet e Bashkimit Europian që të bashkëpunojnë për konkretizimin e perspektivës europiane të vendeve të Ballkanit Perëndimor, në dobi të rajonit, por edhe të vetë Europës.

Ndaje me miqte