E di që nuk them asnjë gjë të re, nëse ju rikujtoj se viti 2019 ishte ndër më të vështirët për të gjithë ekonominë e vendit dhe padyshim edhe për sipërmarrjen private. Përkeqësimin e klimës së biznesit, e evidentoi edhe raporti Doing Bussiness i Bankës Botërore, i cili theksoi se korrupsioni në rritje në vend, bëri që investimet private të mbeten të ulëta dhe varfëria të thellohet. Mirëpo ky korrupsioni, që përmendet pothuajse në çdo frazë, nuk është ndonjë nocion abstrakt, ai ka identitet, ka fytyrë, emër dhe mbiemër. Janë ata që kanë në dorë të përmirësojnë cilësinë e jetës së shoqërisë, por që në fakt kanë zgjedhur që këtë ta bëjnë vetëm për veten e tyre. Dhe si në parimin e enëve komunikuese, kur ka korrupsion, dikush thith nga njëra anë dhe ana tjetër boshatiset.

Si Kryetar i Shoqatës për Mbrojtjen e Tregtarëve dhe Tregut të Shqipërisë, Shoqatë të cilën u detyrova ta marr nën drejtim, sepse ndjehesha i papërfaqësuar nga ato ekzistuese, mund të them me plot gojë se situata e sipërmarrjeve private sot, është një katastrofë. Këtu fus biznesin e madh dhe të vogël dhe kjo vjen sepse gjithçka është përqendruar në pak duar, ata të cilët punojnë dhe ndajnë paratë më politikanët.

Në rrethin e klientelës së pushtetit janë edhe mjaft shoqata biznesi si dhe Dhoma e Tregtisë dhe Industrisë e cila e ka në mision të saj dhe ne ligj, mbrojtjen e interesave të sipërmarrësve.

Nëse ju kujtohet vite më pare, kur Shoqata e Tregtarëve çonte në Gjykatë Kushtetuese ligjet që do falimentonin biznesin, kjo Dhomë asnjëherë nuk i dha mbështetje kauzave të sipërmarrjes. Padyshim që arsyeja është e kuptueshme, interesat personale të bizneseve të Kryetarit Nikolin Jaka, janë prioritare, gjë që nuk e lejon të kryejë misionin e tij në krye të Dhomës së Tregtisë. Kjo është arsyeja pse ai nuk ngre asnjëherë probleme që po falimentojnë biznesin. Nuk flet për çmimin e lartë të energjisë, karburantit, gazit, ujit; për tarifat dhe taksat e larta që po na marrin frymën.

Pra, i ndodhur në këtë konflikt të fortë interesi, ai ka zgjedhur t’i shërbejë vetes, duke mos i bërë as oponencën më të vogël pushtetit. Nikolini dhe Edi janë sot në një muaj mjalti të vërtetë, që nuk po mbaron kurrë, për aq kohë sa paraja shkon në drejtimin e duhur dhe mbi kurrizin tonë. Mjafton të shikoni se çfarë ligjesh ndërtojnë së bashku politikane dhe grupe interesi, për te kuptuar qe ata kane mision vetëm shkatërrimin e sipërmarrjes së lirë të pakapur.

Dhe nëse do vijojmë të mos kërkojmë ndryshim, me siguri absolute, ky do të jetë një vit akoma më i keq se ai që lamë pas. Prandaj u bëj thirrje sipërmarrësve që të ngremë zërin dhe te tregojmë se nuk jemi dele, por dimë se si t’i kërkojmë të drejtat tona. Ne jemi ata që me vizionin tonë, me punën tonë të palodhur, kemi krijuar vende pune, mbajmë me taksa këtë vend, të cilin nuk mund të lejojmë që ta marrin peng një grusht të korruptuarish!

 

*) Autori është biznesmen i njohur dhe njëkohësisht Kryetar i Shoqatës për Mbrojtjen e Tregtarëve dhe Tregut të Shqipërisë

Ndaje me miqte