Pas deklaratës së kryeministrit Mitsotakis se do të jepet një ndihmë prej 400 euro për 155.000 të papunë afatgjatë, Enti grek i Punësimit - OAED, ka nxjerrë një njoftim ku sqaron:
Ndihmën ekonomike e përfitojnë të papunët e regjistruar që kanë marrë cilësinë e të papunit afatgjatë dhe kanë kaluar 12 muaj papunësi të vazhdueshme. Domethënë, që nga 1 prilli 2019 dhe deri në publikimin e vendimit ministror kanë mbetur të papunë dhe nuk kanë marrë asistencën e papunësisë afatgjatë.
Sa i përket mënyrës se si do të paguhen 400 eurot, kjo do të bëhet automatikisht, përmes depozitimit direkt në llogarinë bankare (IBAN) të përfituesit.
-Të papunët që llogaria e tyre bankare është regjistruar në OAED nuk duhet të bëjnë asnjë veprim.
-Të papunët që e kanë llogarinë bankare të regjistruar në OAED, por që duan ta riaktualizojnë, duhet ta bëjnë këtë brenda një afati të caktuar, nëpërmjet një platforme elektronike që do të funksionojë ditët e ardhshme.
-Të papunët që nuk i kanë të dhënat e llogarisë bankare te OAED-i, do të duhet të regjistrojnë llogarinë e tyre bankare brenda një afati të caktuar, nëpërmjet një platforme elektronike që do të funksionojë ditët e ardhshme.
OAED bën gjithashtu të ditur se më shumë informacione për dhënien e ndihmës prej 400 euro, do të jepen pas publikimit të aktit normativ.