Tsipras: “Në gusht 2018, memorandumet do t’i përkasin të kaluarës”

Tribuna TV 23 Maj 2018

"Vendi po vazhdon me hap të qëndrueshëm drejt daljes nga kriza shumëvjeçare dhe mbikëqyrjen mbytëse dhe kanë mbetur metrat e fundit të këtij udhëtimi”. Kështu ka theksuar kryeministri grek, Aleksis Tsipras gjatë fjalës në debatin parlamentar për ekonominë, që ka kërkuar kreu i Lëvizjes për Ndryshim, Fofi Gennimata. 

“Faktikisht, një pjesë e mirë e këtij itinerari u krye me marrëveshjen teknike për vlerësimin e katërt brenda grafikut dhe pa absolutisht asnjë masë tjetër rënduese”, tha kryeministri.

“Në gusht 2018, memorandumet do t’i përkasin përfundimisht të kaluarës”, deklaroi më tej Tsipras. Kryeministri garantoi se javët e ardhshme do të konkludojnë diskutimet për dy nga çështjet e hapura të negociatave, domethënë, konkretizimi i masave për rregullimin e borxhit grek dhe regjimi i mbikëqyrjes për periudhën pas daljes nga programi.

“Greqia sot ka një ekonomi që ecën me ritme esenciale zhvillimi, që pritet të tejkalojnë 2 për qindshin vitet e ardhshme. Po mbyll plagën e papunësisë, e cila në tre vjet është ulur shtatë njësi, përmes krijimit të më shumë se 350.000 vendeve të reja të punës, ndërsa të njëjtin moment puna e padeklaruar ka rënë nga 19% në 13%”, theksoi kryeministri.

“Gjithashtu, 2017-a u mbyll me një super performancë fiskale, siç ndodhi edhe në 2015 dhe 2016”, shtoi. “Dhe kështu arritëm të japim dy vjet rresht dividentet sociale që prekin shifrën 2 miliardë euro. Dhe kemi çdo arsye të konsiderojmë se njëlloj do të arrijmë të bëjmë edhe në 2018-n, mbi bazën e parashikimeve fiskale”.

Ndaje me miqte