Tsipras: Zgjedhjet do të bëhen në vjeshtë

Tribuna TV 15 Mars 2019

Kryeministri grek Aleksis Tsipras ka deklaruar se zgjedhjet parlamentare në Greqi do të zhvillohen në vjeshtë 2019 e jo më herët.

Në këtë mënyrë, Tsipras iu është përgjigjur edhe një herë skenarëve që mëtojnë mbajtjen e zgjedhjeve të përgjithshme bashkë me ato për parlamentin Europian dhe për pushtetin lokal, që do të zhvillohen në muajin maj.

Tsipras foli në mbledhjen e grupit parlamentar të SYRIZA-s në pushtet.

“Të mos shpresojnë se do t’u bëjmë hatrin që të zhvillojmë më herët zgjedhjet e përgjithshme. Gotat e hidhura ata do t’i pinë një nga një”, tha kryeministri grek.

“Në fillim do të vijë zhgënjimi i madh për ta nga zgjedhjet europiane dhe pastaj, në vjeshtë, humbja e tyre përfundimtare, në votën e zgjedhjeve kombëtare”, shtoi Tsipras.

Duke iu referuar zgjedhjeve të ardhshme parlamentare, Tsipras tha se votuesit kanë për të zgjedhur ndërmjet dy rrugëve:

“Populli së shpejti do të ftohet të vendosë nëse vendi do të vazhdojë rrugën që çon te rimëkëmbja ekonomike dhe sociale, apo do të zgjedhë një rrugë tjetër, e cila çon në drejtimin e kundërt.  Sepse mund të ngjajë me një kryqëzim, por në fakt njëra rrugë të shpie drejt dhe rruga tjetër në prapakthim. Prapakthim  në vitet e krizës, në vitet e shtrëngesës së thellë”, tha Aleksis Tsipras.

 

Reagimi i Demokracisë së Re

Ndaj fjalimit të kryeministrit Tsipras ka reaguar partia më e madhe opozitare, Demokracia e Re:

Aleksis Tsipras ka guximin të tundë gishtin, në kohën që duhej më në fund të kërkonte një ndjesë për të këqijat që u solli grekëve dhe veçanërisht shtresës së mesme dhe më të dobtëve.

Do mbetet i vetëm në botën e arrogancës së tij.

Sepse grekët do ta ndëshkojnë ashtu siç i takon, më 26 maj.

Ndaje me miqte